აჭარაში კორონავირუსით ექიმი-რეანიმატოლოგი და ექთანი გარდაიცვალა. ინფორმაციას აჭარის საზოგადოებრივი მაუწყებელი ავრცელებს.

გარდაცვლილი ექიმი-რეანიმატოლოგი ბათუმის რესპუბლიკურ საავადმყოფოში გარდაიცვალა.

გავრცელებული ცნობით, 62 წლის რეანიმატოლოგი ბოლო ერთი კვირის განმავლობაში კლინიკაში მკურნალობდა, დღეს მისი გაწერა იგეგმებოდა, თუმცა მოულოდნელად მდგომარეობა გართულდა.

'სამწუხარო ფაქტი მოხდა, გამოგვაკლდა ერთი კარგი მეგობარი და კოლეგა. კაცი, რომელიც პირველივე დღიდან ამ უხილავ მტერთან ბრძოლაში იყო ჩართული.

რვა დღის განმავლობაში ჩვენთან მკურნალობდა, იმყოფებოდა თერაპიულ განყოფილებაში. მისი მდგომარეობა იყო სტაბილური. ექიმი იყო და თვითონაც აწარმოებდა კონტროლს. მკურნალობის კურსი თითქმის დასრულებული ჰქონდა. გუშინდელ ანალიზებში ყველაფერი იყო ნორმის ფარგლებში.

დღეს უნდა წასულიყო სახლში, მაგრამ გამთენიოს მისი მდგომარეობა უეცრად დამძიმდა. არავინ არ ელოდა. პალატიდან დარეკვა მოასწრო კოლეგებთან, მობილიზებული იქნა მთლიანად რეანიმაციული გუნდი, გადაიყვანეს. გულის უეცარი გაჩერება დაფიქსირდა'' - უთხრა ჟურნალისტებს ბათუმის რესპუბლიკური საავადმყოფოს კლინიკურმა მენეჯერმა გია კიკაბიძემ.

გუშინ, 17 ნოემბერს კორონავირუსით გარდაიცვალა შუახევის კლინიკის ექთანი.