გირჩის ლიდერი ზურაბ ჯაფარიძე აცხადებს, რომ ბათუმში მდებარე ფიტნესკლუბის რეფორმერის დარბაზი საცხოვრებელ სახლად იქირავა. ჯაფარიძემ ინფორმაცია ფეისბუქზე გაავრცელა.

ჯაფარიძე ამბობს, რომ ვარჯიშის მსურველებს დარბაზში მისვლა შეუძლიათ.

"ზეპირ ხელშეკრულებას ვდებთ, ვქირაობ მთელ ამ დარბაზს ჩემს საცხოვრებელ სახლად. სანამ რეგულაციები არსებობს, ეს იქნება საცხოვრებელი სახლი. აქ ვაპირებ, რომ ვიცხოვრო, მაქვს სავარჯიშო ინვენტარი".

ჯაფარიძე ამბობს, რომ ნებისმიერ ადამიანს, ვინც ბათუმში ან ახლოს ვარჯიშობს და დარბაზები დაუკეტეს, შეუძლიათ სტუმრად მის სახლში მივიდნენ და ივარჯიშონ.

მისივე თქმით, შრომის ინსპექცია დარბაზის დაჯარიმებას ვერ შეძლებს, რადგან სალარო აპარატი გამორთული იქნება.

"ხვალიდან უფლება არ აქვს არავის, რომ აქ შემოვიდეს, იმიტომ რომ ჩემი სახლია. შრომის ინსპექციას შეუძლია შემოვიდეს და ნახოს თუ უნდა, სალარო აპარატი მუშაობს თუ არა. აპარატი არ იმუშავებს", - აცხადებს ზურაბ ჯაფარიძე.

ფიტნესკლუბი რეფორმერი, რომელიც საკოორდინაციო საბჭოს მიერ დაწესებულ რეგულაციებს არ დაემორჩილა და მუშაობა არ შეაჩერა, გუშინ, 28 ნოემბერს, შრომის ინსპექციამ 10 000 ლარით დააჯარიმა. ჯარიმის მიუხედავად, კლუბი დაუმორჩილებლობას აგრძელებს და დარბაზი დღესაც ღიაა.