საქართველო კორონავირუსით გარდაცვალების საკმაოდ დაბალ მაჩვენებელს ინარჩუნებს. ამის შესახებ საქართველოს ჯანდაცვის მინისტრმა, ეკატერინე ტიკარაძემ განაცხადა.

"ჩვენ ვაკეთებთ ანალიზს იმის შესახებ, რა არის ქვეყანაში ინფიცირების მაჩვენებელი და ვიცით, რომ საქართველო დღეს იმყოფება ინფექციის გავრცელების აღმავალ ფაზაში. ჩვენ გვაქვს საკმაოდ მაღალი გავრცელება. ლეტალობის მაჩვენებელი არის 0.9 პროცენტი. ეს რთული ასახსნელია მოსახლეობისთვის, როდესაც ჩვენ აბსოლუტურ რიცხვებში ყოველდღიურად ვაცხადებთ ლეტალობის 30-ზე მეტ შემთხვევას, თუმცა ამის ანალიზი კეთდება ჯანმრთელობის მსოფლიო ორგანიზაციიდან. თქვენ იცით, რომ ყოველდღიურად უნდა წარვადგინოთ როგორც ინფიცირების კოეფიციენტი, ასევე ლეტალობის მაჩვენებელი და საქართველო ლეტალობის მხრივ დღეს საკმაოდ დაბალ მაჩვენებელზე რჩება", - განაცხადა ტიკარაძემ.

საქართველოში, პანდემიის გავრცელებიდან დღემდე, ვირუსის 152 704 შემთხვევა გამოვლინდა. გარდაიცვალა 1425 ადამიანი. გამოჯანმრთელდა 126 904 პაციენტი.