ადამიანები, რომლებიც რისკჯგუფში არ არიან და რომლებისთვისაც კოვიდი არ წარმოადგენს სასიცოცხლო რისკის დაავადებას, ვაქცინას ზაფხულში ან შემოდგომის დასაწყისში მიიღებენ. ამის შესახებ დაავადებათა კონტროლის ცენტრის დირექტორის მოადგილე, პაატა იმნაძემ "ტვ პირველის" ეთერში განაცხადა.

მისივე თქმით, პროტოკოლის მიხედვით, უპირველესად ვაქცინას მედპერსონალი მიიღებს, შემდეგ მოდის ასაკობრივი და სხვადასხვა რისკჯგუფი.

"რეალისტები თუ ვიქნებით, ეს იქნება სადღაც ზაფხულში ან შემოდგომის დასაწყისში, ასე ვთქვათ ჩვეულებრივი ადამიანებისთვის, რომლებიც რისკ ჯგუფს არ წარმოადგენენ და რომლებისთვისაც კოვიდი არ წარმოადგენს სასიცოცხლო რისკის დაავადებას", - განაცხადა პაატა იმნაძემ.

პაატა იმნაძის განცხადებით, საქართველოში ის ვაქცინები შემოვა, რომელსაც ჯანმრთელობის მსოფლიო ორგანიზაცია დაამტკიცებს.