ჩოხატაურის რაიონის სოფელ ბუკნარში მუსლიმ და ქრისტიან თემებს შორის შეხვედრა მხარეების შერიგებით დასრულდა.  

მხარებიი შეთანხმდნენ, რომ ცხოვრება ძველებურად გააგრძელონ. მუსლიმური სამლოცველო ჩვეულებრივად გააგრძელებს ფუნქციონირებას. შეხვედრას ესწრებოდნენ ხელისუფლების წარმომადგენლებიც.

"სოფლის წარმომადგენლებმა ერთმანეთს ხელი ჩამოართვეს და ვიმედოვნებ, რომ ეს იქნება დასაბამი ჩვენს ქვეყანაში მარადიულად მშვიდობიანი თანაცხოვრებისა და ურთიერთპატივისცემისა", - განაცხადა სრულიად საქართველოს მუფთმა, ადამ შანთაძემ.

ბოლო ორი დღის განმავლობაში სოფელში საპროტესტო აქციები იმართებოდა. მუსლიმი თემი ხელისუფლებასთან შეხვედრას, სალოცავის მოწყობისა და უსაფრთხო ლოცვის შესაძლებლობას ითხოვდა.

სოფელში დაპირისპირება 12 იანვარს დაიწყო. სამართალდამცველებმა დააკავეს პირი, რომელმაც 2 მუსლიმ თანასოფლელს ქვები ესროლა და ფიზიკურად გაუსწორდა. როგორც გაირკვა, დაპირისპირების მიზეზი მუსლიმი თემის მიერ კერძო სახლში მოწყობილი სამლოცველო გახდა, სადაც სოფლის მკვიდრი მუსლიმი თემი, რომლებსაც ადგილზე სხვა სალოცავი არ გააჩნია, იკრიბებოდა და ლოცულობდა.

კონფლიქტი მომდევნო დღეებშიც გაგრძელდა.