საქართველოს პარლამენტმა "ნაციონალური მოძრაობის" თავმჯდომარეს, ნიკა მელიას სადეპუტატო უფლებამოსილება შეუწყვიტა.

კენჭისყრა პლენარულ სხდომაზე რამდენიმე წუთის წინ გაიმართა.

პარლამენტმა ნიკა მელიას პარლამენტის წევრის უფლებამოსილების ვადამდე შეწყვეტის საკითხს მხარი 79 ხმით დაუჭირა.

საპროცედურო საკითხთა და წესების კომიტეტის თავმჯდომარის, ირაკლი ქადაგიშვილის განცხადებით, 2021 წლის 3 აგვისტოს ნიკანორ მელიამ წერილობით მიმართა პარლამენტს მისი უფლებამოსილების შეწყვეტასთან დაკავშირებით.

საქართველოს კონსტიტუციისა და პარლამენტის რეგლამენტის მიხედვით პარლამენტის საპროცედურო საკითხთა და წესების კომიტეტის შეისწავლა მისი განცხადება, საკომიტეტო მოსმენაზე იმსჯელეს აღნიშნულ საკითხთან დაკავშირებით.

"მისი გუნდის წარმომადგენლებმაც აღნიშნეს, რომ წუხდნენ ნიკანორ მელიას მხრიდან ამ პოზიციის დაფიქსირების გამო. ჩვენ კონსტიტუციისა და რეგლამენტის შესაბამისად განვიხილეთ ეს საკითხი და მივიღეთ კომიტეტის დასკვნა", -განაცხადა ირაკლი ქადაგიშვილმა.

ფრაქცია "შარლ მიშელის რეფორმების ჯგუფის" წარმომადგენლის, ხათუნა სამნიძის განცხადებით, ნიკა მელიას განცხადებასთან ერთად კიდევ 50 დეპუტატის განცხადება იყო ასეთი და არცერთი არ დაკმაყოფილდა პარლამენტის მხრიდან.

ირაკლი ქადაგიშვილის განმარტებით, აღნიშნული პროცედურა რეგლამენტით არის გაწერილი და ნიკანორ მელიას განცხადების დაკმაყოფილების საკითხის განხილვა ზუსტად ჯდება რეგლამენტის მუხლებით მითითებულ ვადებში.

"ჩვენ გადაწყვეტილებები მივიღეთ პოლიტიკური კონტექსტიდან გამიჯნულად. პარლამენტისთვის თქვენგან საბოტაჟის გამოცხადების პერიოდში კომიტეტმა ყველა იმ დეპუტატზე დადო ზუსტად ანალოგიური დასკვნა. პარლამენტის გადასაწყვეტია დააკმაყოფილებს თუ არა ამ საკითხს. წინა შემთხვევაში რატომაც არ დააკმაყოფილა ეს განცხადებები, კარგად მოგეხსენებათ - ჩვენ არ გვინდოდა საქართველოში დემოკრატია სწრაფად დასამარებულიყო იმ ადამიანის კარნახით, რომელიც ხელს აწერდა შარლ მიშელის დოკუმენტს და ასი დღის შემდეგ უარს ამბობს პარლამენტის წევრობაზე და იმ ადამიანის კარნახით, რომელიც დღეს საპყრობილეში იმყოფება და რევოლუციური სცენარების განვითარებით მუდმივად არის დაკავებული. გვინდოდა დავრჩენილიყავით საპარლამენტო დემოკრატიის ერთგულნი და საერთაშორისო პარტნიორების იმ თანამშრომლობის სულისკვეთებით, რითაც ჩვენ ეს მედიაცია ამ ხნის განმავლობაში მოვიტანეთ აქამდე", - განაცხადა ირაკლი ქადაგიშვილმა.

"ნაციონალური მოძრაობის" თავმჯდომარემ, ნიკა მელიამ სადეპუტატო მანდატის შეწყვეტის თაობაზე განცხადება პარლამენტში თავად წარადგინა. მელიამ გადაწყვეტილება მას შემდეგ მიიღო, რაც "ქართულმა ოცნებამ" შარლ მიშელის შეთანხმება ანულირებულად გამოაცხადა.