გერმანიის ხელისუფლების გადაწყვეტილება რუსი დიპლომატების გაძევების შესახებ, უსიამოვნო ეპიზოდია, მაგრამ ამ ფაქტმა ზეგავლენა არ უნდა მოახდინოს ახალი კანცლერის ოლაფ შოლცის პირობებში ორმხრივ ურთიერთობებზე, - განაცხადა რუსეთის პრეზიდენტის პრესსპიკერმა დმიტრი პესკოვმა.

„ეს ეპიზოდი უსიამოვნოა ჩვენ ორმხრივ ურთიერთობებში, მაგრამ მიგვაჩნია, რომ ეს არანაიარდ მოახდენს ზეგავლენას პუტინსა და ახალ კანცლერს შორის დიალოგის გამართვის პერსპექტივაზე“, - განაცხადა პესკოვმა.

ბერლინის უზენაესმა სასამართლომ რუსეთის მოქალაქე ვადიმ სოკოლოვი (კრასიკოვი) დამნაშავედ ცნო საქართვლოს მოქალაქის ზელიმხან ხანგოშვილის მკვლელობის საქმეში და მას უვადო პატიმრობა მიუსაჯა.

სასამართლო გადაწყვეტილების გამოცხადების შემდეგ გერმანიის საგარეო საქმეთა მინისტრმა ანალენა ბერბოკმა განაცხადა, რომ გერმანიამ ორი რუსი დიპლომატი პერსონა ნონ გრატად გამოაცხადა. მისივე თქმით, ზელიმხან ხანგოშვილის მკვლელობა რუსეთთან დიალოგს გაართულებს.

საქართველოს მოქალაქე ზელიმხან ხანგოშვილი ბერლინში 2019 წლის 23 აგვისტოს მოკლეს. მას ველოსიპედით მიმავალმა ქილერმა ქუჩაში ესროლა. ხანგოშვილი ადგილზე გარდაიცვალა.

ეს ხანგოშვილზე მეორე თავდასხმა იყო. 2015 წლის 28 მაისს თბილისში ჩაცხრილეს ავტომობილი, რომელშიც ის იმყოფებოდა. ხანგოშვილი სერიოზულად დაიჭრა. მკურნალობის დასრულებისთანავე მან საქართველო დატოვა.

ზელიმხან ხანგოშვილი 2012 წელს საქართველო-რუსეთის საზღვართან მდებარე სოფელ ლაფანყურის სპეცოპერაციაში შუამავალი იყო. სწორედ ამ სპეცოპერაციას დაუკავშირეს ხანგოშვილის ახლობლებმა 2015 წელს მომხდარი თავდასხმა.

ხანგოშვილის მკვლელობამ ბერლინსა და მოსკოვს შორის დიპლომატიური დაძაბულობა წარმოშვა.