სამხრეთ კორეის ხელისუფლებამ, საახალწლო ამნისტიის ფარგლებში, შეიწყალა ქვეყნის ყოფილი პრეზიდენტი პაკ კინ ჰე, რომელიც კორუფციის ბრალდებით 20-წლიან სასჯელს იხდიდა. იტყობინება ადგილობრივი მედია.

როგორც იუწყებიან შეწყალების გადაწყვეტილება, 69 წლის პაკ კინ ჰეს ჯანმრთელობის გაუარების გამო მიიღეს. მიმდინარე წელს მას ოპერაცია ჩაუტარდა, რის შემდეგაც სამჯერ დასჭირდა ჰოსპიტალიზაცია.

პაკ კინ ჰე სამხრეთ კორეის ყოფილი პრეზიდენტის პაკ ჩონ ჰის შვილია. ყოფილი პრეზიდენტი 1979 წელს მოკლეს. ის იყო ავტორი ცნობილი "კორეული ეკონომიკური სასწაულისა", რომელმაც რამდენიმე ათწლეულის განმავლობაში ღარიბი სასოფლო-სამეურნეო ქვეყანა მსოფლიოს ერთ-ერთ განვითარებულ ქვეყნად აქცია.

1998 წელს პაკ კინ ჰე პარლამენტის წევრად აირჩიეს, 2012 წელს იგი გახდა პირველი ქალი პრეზიდენტი სამხრეთ კორეის ისტორიაში.

2016 წელს პაკ კინ ჰეს ბრალი წაუყენეს სახელმწიფო საიდუმლოების გამჟღავნებასა და კორუფციაში. მასიური ქუჩის პროტესტის შემდეგ, პრეზიდენტს პარლამენტმა იმპიჩმენტი გამოუცხადა, რის შემდეგაც, ის 2017 წელს დააკავეს.

2018 წლის აპრილში სასამართლომ პარკ კინ ჰეს 24 წლით თავისუფლების აღკვეთა მიუსაჯა სახელმწიფო საიდუმლოების გამჟღავნების, გამოძალვის, უფლებამოსილების ბოროტად გამოყენებისა და ქრთამის აღებისთვის. მიმდინარე წლის იანვარში ქვეყნის უზენაესმა სასამართლომ სასჯელი 20 წლამდე შეამცირა.