რუს ტანმოვარჯიშეს ივან კულიაკს დისკვალიფიკაცია ემუქრება მას შემდეგ, რაც საჯაროდ გამოხატა მხარდაჭერა უკრაინაში რუსული აგრესიის მიმართ.

რუსი ტანმოვარჯიშე ივან კულიაკი ყატარში გამართული მსოფლიო თასის კვარცხლბეკზე რუსული საომარი სიმბოლო Z-ით ავიდა. უკრაინაში შეჭრილ რუსულ სამხედრო ტექნიკაზე სწორედ ეს სიმბოლოა გამოსახული.

ხსენებულ შეჯიბრში უკრაინელმა ილია კოვტუნმა გაიმარჯვა. კულიაკი პოდიუმზე სწორედ მის გვერდით იდგა. მოგვიანებით კულიაკმა თავისი საქციელი იმით ახსნა, რომ სურდა ყველას გაეგო, რომელ ქვეყანას წარმოადგენდა ის.

ტანვარჯიშის საერთაშორისო ფედერაციამ გამოაცხადა, რომ თხოვნით მიმართა ეთიკის ფონდს – აღძრას საქმე კულიაკის წინააღმდეგ მისი შოკისმომგვრელი საქციელის გამო. სავარაუდოდ, რუს ტანმოვარჯიშეს ჩამოართმევენ დოჰაში მოპოვებულ ბრინჯაოს მედალს და გაურკვეველი ვადით აუკრძალავენ საერთაშორისო ტურნირებში მონაწილეობას.

ამასთან, ორშაბათიდან, რუს და ბელარუს ტანმოვარჯიშეებს FIG-ის ნებისმიერ ტურნირში მონაწილეობა ეკრძალებათ. ტანვარჯიშის მსოფლიო ფედერაციამ რუსეთისა და უკრაინის მიმართ სანქციები პარასკევს გაამკაცრა.