სისხლის სამართლის საერთაშორისო სასამართლოს პროკურორების განცხადებით, დაიწყეს გამოძიება იმის შესახებ, ჩაიდინა თუ არა ბელარუსის მთავრობამ დანაშაულები, რამაც მისი ოპონენტების დეპორტაცია გამოიწვია, ინფორმაციას Reuters ავრცელებს.

გამოძიება დაიწყო ლიეტუვის მიმართვის საფუძველზე, რომელმაც განაცხადა კაცობრიობის წინააღმდეგ ჩადენილ შესაძლო დანაშაულზე, მათ შორის ისეთებიც, რომლებიც საზღვრის კვეთის ხასიათს ატარებს.

გამოძიება მოიცავს პერიოდს 2020 წლის 1-ელი მაისიდან და ეხება როგორც წარსულ, ისე მიმდინარე მოვლენებს.

ძირითადი ყურადღება გამახვილებულია დეპორტაციასა და პოლიტიკურად მოტივირებულ დევნაზე, რაც შესაძლოა კაცობრიობის წინააღმდეგ დანაშაულად იყოს კვალიფიცირებული.

პროკურორებმა დაადგინეს, რომ ბელარუსის ხელისუფლებამ სავარაუდო დანაშაულების ნაწილი ლიეტუვის ტერიტორიაზე ჩაიდინა, რაც მათ გამოძიების ჩატარების იურისდიქციას ანიჭებს.

„არსებობს გონივრული საფუძველი იმის დასაჯერებლად, რომ ეს დანაშაულები ჩადენილი იქნა მშვიდობიანი მოსახლეობის წინააღმდეგ ფართომასშტაბიანი და სისტემატური თავდასხმის ფარგლებში, მათი მასშტაბის, მსხვერპლთა რაოდენობისა და ქმედებების ორგანიზებული ხასიათის გათვალისწინებით“, - განაცხადეს სასამართლოს პროკურორებმა.