პენტაგონი ირანში ხანგრძლივი სახმელეთო ოპერაციებისთვის ემზადება. ინფორმაციას გამოცემა Washington Post წყაროებზე დაყრდნობით ავრცელებს. წყაროების ცნობით, ოპერაციის ფარგლებში ახლო აღმოსავლეთში ათასობით ამერიკელი ჯარისკაცი და საზღვაო ქვეითი ჩავა, რაც შესაძლოა ომის ახალ, სახიფათო ფაზად იქცეს, თუ აშშ-ის პრეზიდენტი დონალდ ტრამპი ვითარების ესკალაციას გადაწყვეტს.

გამოცემა, ანონიმურ ოფიციალურ წყაროებზე დაყრდნობით, იუწყება, რომ ნებისმიერი პოტენციური სახმელეთო ოპერაცია არ იქნება სრულმასშტაბიანი შეჭრა, არამედ შეიძლება მოიცავდეს სპეციალური დანიშნულების ძალებისა და ჩვეულებრივი ქვეითი ქვედანაყოფების მიერ ერთობლივად განხორციელებულ რეიდებს.

ინფორმაციაში აღნიშნულია, რომ ასეთმა მისიამ, შესაძლოა, ამერიკელი პერსონალი მთელი რიგი საფრთხეების - მათ შორის ირანული დრონებისა და რაკეტების, სახმელეთო ცეცხლისა და თვითნაკეთი ასაფეთქებელი ნივთიერებების წინაშე დააყენოს. გამოცემა ასევე აღნიშნავს, რომ ტრამპის ადმინისტრაცია ბოლო დღეებში ომის შეწყვეტის შესახებ განცხადებებსა და ესკალაციის მუქარას შორის მერყეობდა.