უნგრეთის პრემიერ-მინისტრი ვიქტორ ორბანი მიიჩნევს, რომ ენერგეტიკული კრიზისის გათვალისწინებით, ევროკავშირმა დაუყოვნებლივ უნდა გააუქმოს რუსეთის ენერგეტიკული სექტორისთვის დაწესებული სანქციები. ამის შესახებ ის Х- წერს.

ორბანი პოლონეთის პრემიერ-მინისტრის, დონალდ ტუსკის განცხადებას გამოეხმაურა, რომელშიც მან ასევე ახსენა ორბანის მიერ უკრაინისთვის სესხის დაბლოკვა.

„ევროპა ისტორიაში ერთ-ერთი ყველაზე მძიმე ეკონომიკური კრიზისისკენ მიემართება. მსოფლიო სერიოზული ენერგეტიკული კრიზისის წინაშე დგას. ევროპა სერიოზული საფრთხის წინაშეა. ერთადერთი გამოსავალი რუსეთის ენერგეტიკული სექტორისთვის დაწესებული სანქციების მოხსნაა. დაუყოვნებლივ. ჩვენ უნდა ვიფიქროთ არა პუტინზე, არამედ ჩვენს ქვეყანასა და ხალხზე. ომის წაქეზების ნაცვლად, შეიყვარე და გადაარჩინე შენი ქვეყანა, დონალდ!“, - წერს ორბანი.

მანამდე პოლონეთის პრემიერ-მინისტრმა დონალდ ტუსკმა სოციალურ ქსელში დაწერა: „ნატო-ს დაშლის საფრთხე, რუსეთისთვის სანქციების შემსუბუქება, ევროპაში მასშტაბური ენერგეტიკული კრიზისი, უკრაინისთვის დახმარების შეჩერება და კიევისთვის სესხის დაბლოკვა ორბანის მიერ - ეს ყველაფერი პუტინის ოცნების გეგმას ჰგავს“.