აშშ-ში ვიზიტის ფარგლებში „ახალი პოლიტიკური ცენტრი-გირჩის“ თავმჯდომარემ, ზურაბ ჯაფარიძემ შეხვედრა გამართა სენატორ ჯონ მაკქეინთან. მან მადლობა გადაუხადა სენატორს საქართველოს მხარდაჭერისთვის.

შეხვედრაზე განხილული იქნა საქართველოში არსებული პოლიტიკური ვითარება, ქვეყნის წინაშე მდგარი ეკონომიკური პრობლემები, როგორიცაა საქართველოს ეკონომიკის სწრაფი ზრდის უზრუნველჰყოფა და სიღარიბის დაძლევა. მხარეებმა ისაუბრეს, აგრეთვე, მომავალ საპარლამენტო არჩევნებთან დაკავშირებულ საკითხებზე.

სენატორმა მაკქეინმა ხაზი გაუსვა ოქტომბრის არჩევნების სამართლიანად და დემოკრატიულად ჩატარების მნიშვნელობას და გამოთქვა მზადყოფნა, რათა საერთაშორისო რესპუბლიკური ინსტიტუტის მეშვეობით უცხოელი დამკვირვებლების მაქსიმალური ჩართულობა უზრუნველჰყოს. შეხვედრაზე ყურადღება დაეთმო საქართველო-აშშ ორმხრივ ურთიერთობებს, საქართველოს ევროპულ და ევროატლანტიკურ მისწრაფებებს, იმ საგარეო გამოწვევებსა და საფრთხეებს, რომლის წინაშეც საქართველო დგას. განსაკუთრებული აქცენტები გაკეთდა უსაფრთხოების თვალსაზრისით საქართველოს ოკუპირებულ რეგიონებში არსებულ ვითარებაზე.

ამ კონტექსტში, სენატორი დაინტერესდა ზურაბ ჯაფარიძის მიერ გაჟღერებული ინფორმაციით გიგა ოთხოზორიას მკვლელობის შესახებ და სთხოვა მას მიეწოდებინა ხურჩის ტრაგიკული ინციდენტის ამსახველი ვიდეომასალა, რაც შეხვედრის დასრულებისთანავე გაეგზავნა ჯონ მაკქეინს. სენატორის განცხადებით, ის კვლავაც გააგრძელებს საქართველოს მხარდამჭერი რეზოლუციების ლობირებას, მათ შორის თავდაცვის სფეროში. შეხვედრის დასასრულს ზურაბ ჯაფარიძემ და ჯონ მაკქეინმა გამარჯვება უსურვეს ერთმანეთს საპარლამენტო და სენატის არჩევნებში. სენატორ მაკქეინთან შეხვედრაში ასევე მონაწილეობდნენ „გირჩის“ საერთაშორისო მდივანი, მამუკა კუდავა და საერთაშორისო საკითხებში მრჩეველი, გია ჯაფარიძე.