ფატუ ბენსუდა: ჩემი აზრით, ეს კაცობრიობის წინააღმდეგ ჩადენილი დანაშაულია

2008 წლის კონფლიქტის შედეგად, ოკუპირებულ ტერიტორიაზე ეთნიკურად ქართველი მოსახლეობის რაოდენობა დაახლოებით, 15 000-ით შემცირდა, რაც სამხრეთ ოსეთში მანამდე არსებული მოსახლეობის 75%-ს წარმოადგენს. ეს, ჩემი აზრით, კაცობრიობის წინააღმდეგ ჩადენილი დანაშაულია, - ამის შესახებ ჰააგის სასამართლოს პროკურორმა ფატუ ბენსუდამ სასტუმრო „ქორთიარდ მარიოტში“ გამართულ პრესკონფერენციაზე განაცხადა.

 პროკურორის განცხადებით, მისმა სამსახურმა მხარეთა შორის ჩადენილი სავარაუდო დანაშაულების შესახებ ინფორმაცია მოიძია, რომელშიც სამხრეთ ოსეთის, რუსეთისა და საქართველოს შეიარაღებული ძალები მონაწილეობდნენ.

„გვაქვს უფლებამოსილება, საქართველოს ტერიტორიაზე ნებისმიერი პიროვნების მიერ ჩადენილი სავარაუდო დანაშაულები გამოვიძიოთ. ასევე, გვაქვს უფლება, გამოვიძიოთ და სისხლისსამართლებრივი დევნა ვაწარმოოთ ისეთ დანაშაულებზე, როგორიცაა მკვლელობები, იძულებით გაუჩინარება და ეთნიკურად ქართველი მოსახლეობის დევნა, მათი ქონების განადგურება და ძარცვა ჩადენილი სამხრეთ ოსეთის ძალების მიერ, რომელშიც შესაძლოა, მონაწილეობას რუსეთის ძალები იღებდნენ“, - განმარტა ჰააგის სასამართლოს პროკურორმა.

მისივე ვარაუდით, რუსეთ-საქართველოს 2008 წლის კონფლიქტის შედეგად, ოკუპირებულ ტერიტორიაზე ეთნიკურად ქართველი მოსახლეობის რაოდენობა დაახლოებით, 15 000-ით შემცირდა, რაც სამხრეთ ოსეთში მანამდე არსებული მოსახლეობის 75%-ს წარმოადგენს.

„ეს, ჩემი აზრით, კაცობრიობის წინააღმდეგ ჩადენილ დანაშაულს წარმოადგენს, რაც ცხადია, ძალიან მძიმე დანაშაულია. გარდა ამისა, ჩვენ ომის შესაძლო დანაშაულებად მიგვაჩნია სამხრეთ ოსეთის ძალების მიერ საქართველოს სამშვიდობო ძალებზე შეტევის მიტანა და საქართველოს სამშვიდობოების წინააღდეგ რუსეთის ძალების მიერ შეტევის განხორციელება“, - აღნიშნა ბენსუდამ.