ოლანდმა ალეპოს დაბომბვას სამხედრო დანაშაული, მერკელმა კი არაადამიანური ქმედება უწოდა

საქართველო, თბილისი - 10:00 | 20.10.2016

ნანახია: 1646

გერმანიის კანცლერმა ანგელა მერკელმა და საფრანგეთის პრეზიდენტმა ფრანსუა ოლანდმა ვლადიმერ პუტინს ალეპოს დაბომბვისას ”ჰუმანიტარული პაუზის” გაგრძელებისკენ მოუწოდეს.

როგორც ცნობილია, ალეპოში რუსულმა მხარემ ”ჰუმანიტარული პაუზა” გამოაცხადა. 11 საათის განმავლობაში შეწყდება საბრძოლო მოქმედებები, რა დროსაც ქალაქის მოსახლეობა საშიშ რაიონებს რვა ჰუმანიტარული კორიდორის საშუალებით დატოვებს.

”რამდენიმესაათიანი შესვენება აზრსმოკლებულია”, - განაცხადა ოლანდმა მერკელთან და პუტინთან შეხვედრისას. საფრანგეთისა და გერმანიის ლიდერებმა ბერლინში ”ნორმანდიული ფორმატის” შეხვედრის შემდეგ, სადაც უკრაინის საკითხზე მსჯელობდნენ, პუტინთან სირიაში ასრებული ვითარება განიხილეს. გერმანიის კანცლერმა პუტინთან მოლაპარაკებას უმძიმესი უწოდა.

ოლანდმა შეხვედრის შემდეგ ალეპოს წინააღმდეგ ავიადრტყმები სამხედრო დანაშაულად შეაფასა.

”ის, რაც ალეპოში ხდება სამხედრო დანაშაულია. ერთ-ერთი მთავარი მოთხოვნა რეჟიმისა და მისი მოკავშირეების მხრიდან დაბომბვის შეწყვეტაა”, - განაცხადა ოლანდმა.

ანგელა მერკელმა თავის მხრივ ქალაქის დაბომბვას არაადამინური და სასტიკი ქმედება უწოდა.