თეთრი სახლი - არჩევნები ადასტურებს, რომ საქართველო რეგიონში დემოკრატიული რეფორმების ლიდერია

30 ოქტომბრის არჩევნები ადასტურებს, რომ საქართველო რეგიონში დემოკრატიული რეფორმების ლიდერია. ამის შესახებ ნათქვამია თეთრი სახლის პრესსპიკერის ნედ პრაისის განცხადებაში.

“აშშ ულოცავს საქართველოს მოსახლეობას გუშინდელი საპარლამენტო არჩევნების წარმატებით დასრულებას, რომელიც ადასტურებს, რომ საქართველო რეგიონში დემოკრატიული რეფორმების ლიდერია. აღვნიშნავთ, რომ ეუთო-ს საარჩევნო სადამკვირვებლო მისიამ შეაფასა როგორც 8 ოქტომბერს ჩატარებული არჩევნები, ისე 30 ოქტომბერს გამართული მეორე ტური როგორც კონკურენტული და ადმინისტრირებული კანდიდატებისა და ამომრჩევლების უფლებების პატივისცემით”, - აღნიშნლია თეთრი სახლის განცხადებაში.

აშშ-ის პრეზიდენტის ადმინისტრაცია შეშფოთებას გამოთქვამს ძალადობისა და დაშინების ცალკეული ინციდენტების გამო და ხელისუფლებას მათი გამოძიებისკენ მოუწოდებს.

“სხვადასხვა სპექტრის პოლიტიკურმა ლიდერებმა შეასრულეს მნიშვნელოვანი როლი მხარდამჭერებისადმი საარჩევნო პერიოდში თავშკავებულობისკენ მოწოდებებით, ამგვარად ქართველმა ამომრჩეველმა შეძლო თავისუფლად გაეკეთებინა თავისი არჩევანი.

ამის მიუხედავად, ჩვენ შეშფოთებული ვართ ძალადობისა და დაშინების ცალკეული ინციდენტების გამო და მოვუწოდებთ ანგარიშვალდებულებისკენ, ასევე, კანონის უზენაესობის შესაბამისად, დეტალური და დაბალანსებული გამოძიებისკენ. მოვუწოდებთ ყველა პარტიის პოლიტიკურ ლიდერებს, იმუშაონ ერთად ყველა ქართველისთვის მნიშვნელოვანი მიზნების მისაღწევად, მათ შორის დემოკრატიული კონსოლიდაციის, უსაფრთხოების და ეკონომიკური განვითარების. მზად ვართ, ვიმუშაოთ ახალ მთავრობასთან და პარლამენტთან საქართველოს დემოკრატიული და ეკონომიკური განვითარების, სუვერენიტეტისა და ტერიორიული მთლიანობის, ასევე მისი ევროატლანტიკური მისწრაფებების მხარდასაჭერად”, - ნათქვამია თეთრი სახლის განცხადებაში.