,,დღის შოუ” განმარტებას აკეთებს - ბავშვის ტირილი პირდაპირ ეთერში, გამოწვეული იყო ძილის პერიოდის დადგომით

ტელეკომპანია “იმედის” გადაცემა “დღის შოუს” ეთერში რამდენიმე თვის გოგონას ყური პირდაპირ ეთერში გაუხვრიტეს. ამ ფაქტმა საზოგადოების აღშფოთება გამოიწვია, რადგან ბავშვი ყურის გახვრეტის პროცესში ტიროდა. ფეისბუკმომხმარებლებმა გადაცემის დახურვაც კი მოითხოვეს. აღნიშნულ ფაქტს, ,,დღის შოუ” სპეციალური განცხადებით გამოეხმაურა:

,,დღევანდელი „მშობელთა კრების„ ერთერთმა თემამ, „ როგორ გავუხვრიტოთ ბავშვს ყური და რა უნდა ვიცოდეთ ამ პროცედურის შესახებ„ , ჩვენი ზოგიერთი მაყურებლის აღშფოთება გამოიწვია, რადგან პროცედურის დაწყებამდე ბავშვმა იტირა.

გვსურს გაცნობოთ, რომ ბავშვის ტირილი, ზოგადად, ჩვენც „ დღის შოუს „ პროდიუსერებსა და წამყვანებს , გვაშფოთებს და გვანერვიულებს. თუმცა ამ შემთხვევაში ყურის გახვრეტა გამოცდილი სპეციალისტების მიერ, ყველა წესის დაცვით მოხდა.
ამასთან, თავად ბავშვის მშობელი თანახმა იყო პროცედურა პირდაპირ ეთერში ჩატარებულიყო და განმარტა, რომ ბავშვის ტირილი პირდაპირ ეთერში გამოწვეული იყო ძილის პერიოდის დადგომით. თავად პროცედურა კი აბსოლუტურად უმტკივნეულოა.
„დღის შოუს“ ამ კონკრეტულ გადაცემაში სწორედ იმის ჩვენება გვსურდა, როგორ მიმდინარეობს ეს პროცედურა და პასუხი გაგვეცა იმ დედებისთვის, რომლებიც გამუდმებით გვწერენ, მიზანშეწონილია თუ არა ჩვილისთვის ყურის გახვრეტა. ამ დემონსტრირებით, გვსურს მათ თავად გადაწყვიტონ, გაუხვრეტენ თუ არა საკუთარ შვილებს ყურს ადრეულ ასაკში.
აქვე გაცნობებთ, რომ პროცედურის შემდეგ, პატარა ნატალიმ შეწყვიტა ტირილი (რაც ეთერშიც ჩანდა ), მიირთვა და მშვიდად დაიძინა”, – ვკითხულობთ განცხადებაში.