„მკვლელს ეთნიკური წარმომავლობა არ აქვს, ეს იყო ზოგადი შეფასება“ - ქუცნაშვილი ცერცვაძის საქმეზე

საპარლამენტო უმრავლესობის ერთ-ერთი ლიდერი, ზაქარია ქუცნაშვილის განცხადებით, გია ცერცვაძესთან დაკავშირებით მის მიერ გაკეთებული განცხადება მედიამ არასწორად გაიგო.

„მე მიმაჩნია, რომ მკვლელს ეთნიკური წარმომავლობა არ აქვს, ეს იყო ზოგადი შეფასება,“-განაცხადა ზაქარია ქუცნაშვილმა და ვრცლად განმარტა თუ რას გულისხმობდა, ორშაბათს მის მიერ გაკეთებულ განცხადებაში , სადაც თქვა, რომ საქართველომ "მკვლელების საკითხზე ნებისმიერ ქვეყანასთან უნდა ითანამშრომლოს."

"გაყალბებული სიუჟეტი ვუწოდე მე ამას, როდესაც სამჯერ კიბეებზე დადევნებული ჟურნალისტი გეკითხება იცნობ თუ არა ცერცვაძის ქეისს, პასუხობ, რომ ცერცვაძის ქეისს არ იცნობ, ამის მიუხედავად მაინც გეკითხება გამიკეთე კომენტარი უნდა ვითანამშრომლოთ თუ არა მკვლელობის საქმეზე დაპატიმრებულ მოქალაქეებზე, აძლევ პასუხს რომ მკვლელობის საქმეზე უნდა ვითანამშრომლოთ ნებისმიერ ქვეყანასთან და ამას აბამს იმ ქეისს, რომელი ქეისიც შეუძლებელია ვიცოდეთ ჩვენ. ეს ჟურნალისტი სუფთა ფაქტების გამყალბებელი ჟურნალისტი, ნაცვლად იმისა, რომ თუ არ იცნობ ფაქტებს არ მოითხოვო მისი შეფასება, გეუბნება ზოგადად შემიფასე მკვლელობის საქმეებზე უნდა ვითანამშრომლოთ თუ არ უნდა ვითანამშრომლოთ. აქედან გამომდინარე ამას თუ იკადრებ ყველაფრის მიწებება შეიძლება,“- აცხადებს "ქართული ოცნების" ერთ-ერთი ლიდერი.

ზაქარია ქუცნაშვილი ფიქრობს, რომ ცერცვაძის საქმეზე საზოგადოების პრეტენზიები ხელისუფლების მიმართ არაარგუმენტირებულია.