საქართველოს პრეზიდენტი სახალხო დამცველს შეხვდა

საქართველოს პრეზიდენტი გიორგი მარგველაშვილი სამართალდამცავ ორგანოებს მიმართავს და მოუწოდებს წამების ფაქტებთან დაკავშირებით საზოგადოებას ანგარიში ჩააბარონ.

აღნიშნული განცხადება საქართველოს პრეზიდენტმა გიორგი მარგველაშვილმა სახალხო დამცველთან უჩა ნანუაშვილთან შეხვედრის შემდეგ გააკეთა.

„ძალიან სამწუხაროა, რომ ჩვენ ვცხოვრობთ ისეთ გარემოში, სადაც ფაქტობრივად ყოველდღე ვხედათ ახალ, ამაზრზენ ვიდეოებს. ეს ის სტრესული გარემოა, რომელშიც დღეს საზოგადოება ცხოვრობს. მე მინდა ხაზგასმით აღვნიშნო, რომ ჩვენ ვგმობთ ძალადობის, სადიზმის ყველა ფორმას და აგრეთვე, ამ ინფორმაციის ტირაჟირებას. მე მივმართავ ყველა სამართალდამცავ ორგანოს, გამომდინარე საზოგადოების მაღალი ინტერესიდან, ჩააბარონ ანგარიში საზოგადოებას, ამ კატასტროფულ ვიდეოებში ასახული ძალადობის ფაქტებთან დაკავშირებით, რომლებიც რამდენადაც ჩვენ ვხედავთ სისტემური იყო - რამდენი ადამიანის მიმართ წარმოებს, ან წარმოებდა სამართლებრივი დევნა, რამდენი ადამიანია მიცემული პასუხისგებაში, იმისათვის, რომ ჩვენში გამყარდეს იმის განცდა, რომ სადისტები და მოძალადეები სამართლიანად დევნილები არიან და მათ საზოგადოება, ისევე, როგორც პოლიტიკური სისტემა, არასდროს შეუნდობს იმას, რაც კეთდებოდა და რაც ვნახეთ ამ კატასტროფულ კადრებში“, - განაცხადა საქართველოს პრეზიდენტმა.

სახალხო დამცველის უჩა ნანუაშვილის განცხადებით, შეხვედრისას ორ მნიშვნელოვან საკითხზე ისაუბრეს - ბოლომდე უნდა მივიდეს წამების კადრებთან დაკავშირებული გამოძიება, პროცენტულად მხოლოდ მცირე ნაწილი არის გამოძიებული და ერთეული საქმეები არის დასრულებული. და, მეორე საკითხი, სახალხო დამცველის განცხადებით, ყველა მეთოდის გამოყენებით, უნდა შეიზღუდოს იმ კადრების გავრცელება, რომელიც ბოლო პერიოდში გამოჩნდა, რადგან მას უკუეფექტი აქვს და შეიძლება ითქვას, რომ კიდევ უფრო მეტ რისკებს აჩენს საზოგადოებაში დაძაბულობის კერების შექმნისა და ძალადობის ესკალაციის კუთხით.

--