საინტერესოა, რა მილიონებზე საუბრობდა გვარამია - მამუკა მდინარაძე

ფრაქცია „ქართული ოცნების“ თავმჯდომარე მამუკა მდინარაძე ,,უკრაინული რევოლუციის“ მიერ გამოქვეყნებულ აუდიო ჩანაწერს ეხმიანება და აცხადებს, რომ თუნდაც მონტაჟი იყოს, საინტერესოა, რა მილიონებზე საუბრობს გვარამია.

"გამოძიებამ უნდა დაადგინოს ჩანაწერების ავთენტურობა. რაც შეეხება შინაარსს, ამაში გასაკვირი არაფერია, ეს არის მათი სტილი. თუნდაც მონტაჟი იყოს, საინტერესოა, რა მილიონებზე საუბრობდა (გვარამია). ჩანაწერების ავთენტურობა სანამ არ დადგინდება, კონკრეტული ბრალდებები არ შეიძლება გამოითქვას, თუმცა ჩვენ ვიცით, რომ ეს არის მათი მოქმედებების სტილი", - განაცხადა მდინარაძემ. 

რაც შეეხება გვარამიას მხრიდან ჩანაწერების გამოქვეყნებაში სუს-ის დადანაშაულებას, მდინარაძის თქმით, ყველა ქვეყანაში ადვილია დადანაშაულება კონკრეტული თანამდებობის პირის თუ ხელისუფლების.

უკრაინული გამოცემა "უკრაინული რევოლუცია" საქართველოს ყოფილი გენერალური პროკურორის ზურაბ ადეიშვილისა და "რუსთავი 2"-ის გენერალური დირექტორის ნიკა გვარამიას სატელეფონო ჩანაწერს აქვეყნებს. ჩანაწერში მოსამართლეებზე ზეწოლასა და ქრთამის სახით 3 მილიონი დოლარის მიცემაზეა საუბარი. ნიკა გვარამიამ დღეს გამართულ პრესკონფერენციაზე განაცხადა, რომ ეს არის მონტაჟი.