საქართველოს სახელმწიფო ორგანოებმა ცერცვაძის პერსონალური მონაცემები რუსეთის ფედერაციას გადასცა - ენმ

პარლამენტის სესიაზე ენმ-მ ვიცე პოლკოვნიკ ცერცვაძის საქმესთან დაკავშირებით საგამოძიებო კომისიის შექმნის საკითხი დააყენა. ინიციატივის შესახებ სალომე სამადაშვილმა ისაუბრა.

”ნაციონალური მოძრაობის” წარმომადგენლები ირწმუნებიან, რომ საქართველოს სახელმწიფო ორგანოებმა ცერცვაძის პერსონალური მონაცემები რუსეთის ფედერაციას გადასცა. 

ინიციატივას უმრავლესობის წევრი ზაზა გაბუნია გამოეხმაურა და ენმ ქვეყნის ინტერესების დისკრედიტაციის მცდელობაში დაადანაშაულა.

მისი თქმით, სამხედრო მოსამსახურეების შესახებ საიდუმლო ინფორმაცია არ გადაეცემა არავის.

,,ენმ არ ისვენებს ოღონდ არა ჩვენი ქვეყნის ინტერესების დაცვისთვის, არამედ პირიქით, ჩვენი ქვეყნის ეროვნული ინტერესების დისკრედიტაციისთვის ყველაფერს აკეთებს. განცხადებები და ფორმულირება, რომელსაც ჩვენ ვხედავთ, არის ცალსახად იერიშის მიტანის მცდელობა ჩვენი ქვეყნის ეროვნულ ინტერესებზე.  გია ცერცვაძის უსაფრთხოებისთვის ყველაფერი გააკეთა სახელმწიფომ. ამ საქმეში ჩართული იყო ქვეყნის ყველა კომპეტენტური ორგანო შიგნით და საქართველოს ქვეყნის გარეთ საელჩო. ასე უბრალოდ გადახაზვა წითელი ხაზით ამ საკითხის, არის უმოწყალო სპეკულირება თემასთან მიმართებით. 
ვფიქრობ, დადგენილების პროექტი არ უნდა გავიზიაროთ. ”ნაციონალური მოძრაობის” მიერ ფორმულირებული ტექსტი ცალსახად შეიცავს ცილისმწამებლურ პოზიციას სახელმწიფოს მიმართ.

ცალსახად ცილისწამებაა მოცემული დადგენილების პროექტის ფორმულირებაში. სამხედრო მოსამსახურეების შესახებ საიდუმლო ინფორმაცია არ გადაეცემა არავის. ეს არის მორიგი უპასუხისმგებლობა ”ნაციონალური მოძრაობის” მხრიდან, როცა ძალიან მგრძნობიარე საკითხით მანიპულაციის გზით, თქვენ გსურთ სამხედრო მომსამსახურეების, მათი ოჯახის წევრების და არაინფორმირებული საზოგადოების შეცდომაში შეყვანა”, - განაცხადა ზაზა გაბუნიამ.

გია ცერცვაძე, რომელიც აფხაზეთისა და 2008 წლის ომებში რუსეთის წინააღმდეგ იბრძოდა, რუსეთის მოთხოვნით, უკრაინაში 15 იანვარს დააკავეს. ქართველი სამხედრო უკრაინის სასამართლომ პატიმრობიდან 26 იანვარს გაათავისუფლა.