„საქართველოს თანამედროვე ისტორია გვიდასტურებს, რომ აზერბაიჯანი ჩვენი ერთ-ერთი დიდი მეგობარი, მეზობელი და ინვესტორია. კონკურენციის უწყებებს შორის მჭიდრო თანამშრომლობის ჩამოყალიბება, ვფიქრობ, სასარგებლო, საჭირო და დროულია. კონკურენცია არის ის ძალა, რომელიც ქმნის და განსაზღვრავს ქვეყნის ეკონომიკის პროგრესს. იქ, სადაც ჯანსაღი კონკურენციის ხელშეწყობა პრიორიტეტია, იქმნება ხარისხიანი პროდუქცია, რომლისკენ სვლაც დღეს ორივე ქვეყნის ინტერესში შედის. ჩვენი ვალია, ამ კუთხით, სწორი ნაბიჯები გადავდგათ“, - განაცხადა საქართველოს კონკურენციის სააგენტოს თავმჯდომარე ნოდარ ხადურმა.

„ჩვენი მეგობრობა და თანამშრომლობა აღნიშნულ სფეროში, დარწმუნებული ვარ, სამომავლოდ, მნიშვნელოვანი პროექტების განხორციელებას შეუწყობს ხელს და ჩვენს ქვეყნებს შორის მეგობრობას, რომლისკენ გზაც წარმატებულ თანამშრომლობაზე გადის, კიდევ უფრო განამტკიცებს“, - განაცხადა დურსუნ ჰასანოვმა.

ნოდარ ხადურმა ელჩს კონკურენციის სააგენტოში სტუმრობისთვის მადლობა გადაუხადა. მხარეები შეთანხმდნენ, რომ თანამშრომლობის გაღრმავების მიზნით, შეხვედრები გაგრძელდება.