ოთარ კახიძე: კლუბური ნარკოტიკისთვის ახალგაზრდებს 8 წლით პატიმრობას უსჯიან - ეს მიდგომა არის გადასახედი

მოძრაობა თავისუფლებისთვის-ევროპული საქართველო ნარკოტიკების მომხმარებელთა მიმართ პოლიტიკის შესაცველელად პარლამენტში საკანონმდებლო ინიციატივით შედის

ოთარ კახიძის განცხადებით, საკონსტიტუციო სასამართლომ მიიღო გადაწყვეტილება იმის თაობაზე, რომ მარიხუანას მოხმარებისთვის აკრძალული იყოს თავისუფლების აღკვეთის გამოყენება.

,,პარლამენტში შემოტანილია შესაბამისი ინიციატივა, რომელიც ამ გადაწყვეტილების აღსრულებას ეხება, რასაც მივესალმებით. მიგვაჩნია, რომ ანალოგიური მიდგომა, თავისუფლების აღკვეთის როგორც სასჯელის აკრძალვა უნდა გავრცელდეს აგრეთვე კლუბურ ნარკოტიკებზე და მათ მოხმარებაზე. ჩვენ გვაქვს არაორდინალური სიტუაცია. პრაქტიკულად, დრაკონური სისხლისამართლის კანონმდებლობა, რომელიც ითვალისწინებს, მაგალითად გაუპატიურებისთვის 6-დან 8 წლამდე თავისუფლების აღკვეთას, ყაჩაღობისთვის 5-დან 7 წლამდე თავისუფლების აღკვეთას, ამბოხება და შეთქმულება კონსტიტუციური წყობილების შესაცვლელად 5-დან 8 წლამდე თავისუფლების აღკვეთას და ამ პირობებში, კლუბური ნარკოტიკის ქონისთვის ახალგაზრდებს 8 წლით თავისუფლების აღკვეთას უსჯიან. ეს მიდგომა არის გადასახედი. სისხლის სამართლის კოდექსი საჭიროებს ფუნდამენტურ გადახედვას და ჩვენ შევდივართ პარლამენტში ინიციატივით, რომ ნარკოტიკების მოხმარებელთა მიმართ პოლიტიკა ფუნდამენტალურად შეიცვალოს. აქ არ იგულისხმება რა თქმა უნდა გასაღების მიზანი. ჩვენთვის მნიშვნელოვანია დაცული იყოს საზოგადოებრივი წესრიგი, მაგრამ ეს უნდა მოხდეს იმგვარად, რომ რაც შეიძლება ნაკლები ადამიანი წავიდეს ციხეში და პატიმრობა, როგორც თავისუფლების აღკვეთა არ იყოს გამოყენებული სასჯელად”, - აცახდებს ოთარ კახიძე.