თვითდაზიანებები არ მიმიყენებია, შსს მიკერძოებული მხარეა - ლაშა თორდია

ვიდეოკადრებში ჩანს, რომ პირველი თავდამსხმელი ოთარ ფარცხალაძეა. ჩანს, რომ არ იყო წამიერი ინციდენტი და თვითდაზიანებები არ მიმიყენებია. შსს მიკერძოებული მხარეა. მივმართავ პარლამენტს, შეიქმნას საგამოძიებო კომისია, - აცხადებს ლაშა თორდია.

ლაშა თორდიამ დღეს გამართულ ბრიფინგზე განაცხადა, შსს-მ ინციდენტის ამსახველი ვიდეოკადრები იმ რაკურსით წარმოაჩინა, მისი დისკრედიტაცია მომხდარიყო.

„როგორც ჩემთვის მოსალოდნელი იყო შსს-მ კადრები წარმოაჩინა ისეთ რაკურსით, რომ მომხდარიყო ჩემი დისკრედიტაცია, რომ მე დავარტყი პირველი ხელი ფარცხალაძე, თუმცა კადრებიდან ჩანს, როგორ მირტყამს პირველი ფარცხალაძე. მათივე კადრებიდან დასტურდება, რომ იქ არ ყოფილა წამიერი შეხვედრა, არ ყოფილა მომენტალური გადაკვეთა და რაზეც საუბრობენ ადვოკატები, თვითდაზიანება მივიყენე არის აბსურდი. მათივე კადრებიდან ჩანს, რომ ინციდენტი მოხდა და კადრები არის წარმოდგენილი იმ რაკურსით, რომ გაგრძელება ვერ დავინახოთ. ცალსახად ვაცხადებ, რომ შსს არის დაინტერესებული, მიკერძოებული მხარე. კადრებიდან ჩანს, რომ ფარცხალაძის და მისი დაცვის წევრების მხრიდან მოხდა თავდასხმა.  მე არ მახსოვდა, რომ ოთარ ფარცხალაძემ დამარტყა პირველმა და ამ კადრებიდან დავრწმუნდი, რომ მან დამარტყა პირველად“, - განაცხადა ლაშა თორდიამ.

დღეს შინაგან საქმეთა სამინისტრომ ლაშა თორდიას და ოთარ ფარცხალაძეს შორის ინციდენტის ამსახველი ვიდეოკადრები გაავრცელა. მთავარმა პროკურატურამ კი, აუდიტის მასალები გამოითხოვა.