ტერეზა მეი ტრამპთან პრესაში ტერაქტის გამოძიების შესახებ ინფორმაციის გაჟონვის საკითხს განიხილავს

ბრიტანეთის პრემიერ-მინისტრი ტერეზა მეი აშშ-ის პრეზიდენტთან დონალდ ტრამპთან მანჩესტერის ტერაქტის გამოძიების შესახებ ინფორმაციის გაჟონვის საკითხს განიხილავს. გაზეთ New York Times-ში აფეთქების ადგილის ამსახველი ფოტოსურათების გამოქვეყნებამ ბრიტანეთის ხელისუფლების აღშფოთება გამოიწვია.

მოსალოდნელია, რომ დიდი ბრიტანეთი ამ საკითხს ბრიუსელში ნატოს სამიტზე ამერიკის პრეზიდენტთან განიხილავს.

ფოტოები New York Times-ში გუშინ გავრცელდა. ფოტოებზე ჩანს ზურგჩანთის ნაფლეთები, სისხლით დასვრილი ბომბის ნამსხვრევები, ასევე მოწყობილობა, რომელიც დეტონატორს გავს.

ამის გარდა თვითმკვლელის სალმან აბედის  შესახებ პირადი ინფორმაცია ამერიკულ პრესაში აფეთქებიდან 24 საათში გავრცელდა.

შს მინისტრმა ემბერ რადიმ განაცხადა, რომ ინფორმაციის გაჟონვის გამო აღშფოთებულია და ვაშინგტონი გააფრთხილა, რომ ეს აღარასდროს უნდა განმეორდეს.

ამის მიუხედავად აშშ-ის შემდეგ ფოტოები ბრიტანულ მედიაშიც გავრცელდა.

ბრიტანეთის პოლიცია მიიჩნევს, რომ პუბლიკაციებმა შესაძლოა გამოძიება დააზარალოს.