საქართველოს დამოუკიდებლობის დღეს მსოფლიოს მრავალ ქვეყანაში აღნიშნავენ

საქართველოს დამოუკიდებლობის დღეს მსოფლიოს სხვადასხვა ქალაქში ზეიმობენ. ინფორმაციას, თუ როგორ აღნიშნავენ სხვადასხვა ქვეყნის დიპლომატიური წარმომადგებლობები ამ დღეს, საგარეო საქმეთა სამინისტრო თავის facebook-ზე ავრცელებს. 

26 მაისს სადღესასწაულო ღონისძიებები იმართება საფრანგეთში, ნორვეგიაში, ირლანდიაში, კატარში, ეთიოპიაში და ა. შ.

საგარეო უწყების ინფორმაციით, საქართველოს დამოუკიდებლობის დღესთან დაკავშირებით, დღეს პარიზში, სორბონის უნივერსიტეტის რიშელიეს სახელობის ამფითეატრში, გაიმართება ქართული საღამო ანსამბლ „თამარიონისა“ და საფრანგეთში მოღვაწე ქართველი მომღერლის, ელგა ფორჩხიძის, მონაწილეობით. საღამოზე ნაჩვენები იქნება მოკლემეტრაჟიანი ფილმი საქართველოს შესახებ.

ასევე, ნორვეგიაში, გაიმართება საზეიმო მიღება, სადაც წარმოდგენილი იქნება პრეზენტაცია საქართველოს ტურისტული პოტენციალის შესახებ და ასევე, ქართული ეროვნული სამოსის გამოფენა.

საქართველოს დამოუკიდებლობის დღე სადღესასწაულო მიღებით აღინიშნება ლიტვაში, სადაც ასევე, საქართველოს საელჩოს ორგანიზებით, ვილნიუსის ცენტრალურ გამზირზე, ლიტვის ეროვნული ბიბლიოთეკის შენობის ფასადზე გამოიფინა საქართველოს გიგანტური დროშა.

საქართველოს დამოუკიდებლობის დღეს ზეიმობენ ირლანდიის დედაქალაქშიც. ირლანდიაში ქართული დიასპორის ინიციატივითა და საელჩოს ხელშეწყობით გაიმართება დამოუკიდებლობის დღის აღსანიშნავი ღონისძიება/კონცერტი. ასევე, გაიმართება ქართული ეროვნული სამოსის ჩვენება და ღონისძიების სტუმრებს საელჩო ქართული ღვინით გაუმასპინძლდება.

საქართველოს დამოუკიდებლობის დღეს აღნიშნავენ ეთიოპიაშიც, სადაც დღეს გაიმართება საზეიმო მიღება, მოეწყობა გამოფენა ქართული ანბანის სამ სახეობასთან დაკავშირებით, რომლის შემდგომ სტუმრებს ქართული ღვინით გაუმასპინძლდებიან.

დამოუკიდებლობის დღისადმი მიძღვნილი სადღესასწაულო ღონისძიებები გაიმართება მოლდოვასა და სამხრეთ აფრიკაში.

დამოუკიდებლობის დღე უკვე აღნიშნეს თურქეთში, სადაც 25 მაისს გაიმართა საზეიმო მიღება და გამოფენა, რომელიც უკავშირდებოდა საქართველო-თურქეთის დიპლომატიური ურთიერთობების 25 წლისთავს. ხოლო დღეს, 26 მაისს, საქართველოს დროშის ფერებში განათდება თურქეთის პალატებისა და ბირჟების გაერთიანება.

ნიუ-იორკში, 24 მაისს გაიმართა ეროვნული დღესასწაულისადმი მიძღვნილი საზეიმო მიღება. სტუმრებმა დააგემოვნეს ქართული კერძები და ღვინო, ასევე წარმოდგენილი იყო ნიუ-იორკში მოღვაწე ქართული სიმღერის ანსამბლი.

მომავალ დღეებსა და შემდგომ თვეებში საქართველოს დამოუკიდებლობის დღისა და ორმხრივი დიპლომატიური ურთიერთობების 25 წლისთავის აღსანიშნავად იგეგმება სხვადასხვა ღონისძიება სხვადასხვა ქვეყნებში, მათ შორის: კორეის რესპუბლიკაში, ჩინეთში, ნიდერლანდებში, გაერთიანებულ სამეფოში, შვეიცარიაში, ლიხტენშტაინში, საბერძნეთში, ლატვიაში, უკრაინაში, აშშ-ში, ბელარუსში, პოლონეთში, ბელგიაში, ავსტრალიასა და თურქმენეთში.