"ქართული ოცნების“ პოლიტიკური სტანდარტი არ არის ვინმეს გატაცება - ირაკლი სესიაშვილი

"ქართული ოცნების“ პოლიტიკური სტანდარტი არ არის ვინმეს გატაცება და ისეთ სკანდალებში გახვევა, რომელიც შეიძლება საერთაშორისო დონეზე ჩვენი ქვეყნისთვის დამაზიანებელი იყოს, - ამის შესახებ თავდაცვისა და უშიშროების კომიტეტის თავმჯდომარემ ირაკლი სესიაშვილმა აზერბაიჯანელი ჟურნალისტის აფგან მუხთარლის გაუჩინაურების ფაქტთან დაკავშირებით განაცხადა.

ირაკლი სესიაშვილმა იმედი გამოთქვა, რომ გამოძიება ძალიან მალე დასრულდება.

„მომხდარ ფაქტთან დაკავშირებით რაიმე დეტალებზე საუბრისგან თავს შევიკავებ. გამოძიება მიმდინარეობს და სახელმწიფოს შესაბამისი სტრუქტრურები მობილიზებული არიან მაქსიმალურად მოკლე ვადაში დაადგინონ, თუ რა მოხდა. მთავარი ის არის, რომ ნებისმიერ შემთხვევაში სახელმწიფო ინტერესები დაზიანდა და მე ვიტყოდი, რომ ეს არის სახელმწიფოს ღირსების საკითხი. ყველა, ვინც პოლიტიკური თუ სხვა მიზეზებით თითს იშვერს ქართული სპეცსამსახურების მიმართულებით, უნდა ჰქონდეთ გააზრებული, რომ ნებისმიერ შემთხვევაში დაზიანდებოდა სახელმწიფო ინტერესები. "ქართული ოცნების“ პოლიტიკური სტანდარტი არ არის ვინმეს გატაცება და ისეთ სკანდალებში გახვევა, რომელიც შეიძლება საერთაშორისო დონეზე ჩვენი ქვეყნისთვის დამაზიანებელი იყოს. იმედი გვაქვს, რომ გამოძიება ძალიან მალე დასრულდება და ჩვენს საზოგადოებაში კითხვის ნიშნები არ უნდა დარჩეს ამ ფაქტთან დაკავშირებით“ , - განაცხადა ირაკლი სესიაშვილმა.