დემირელის კოლეჯის მენეჯერს, დაკავებულ მუსტაფა ჩაბუქს ლტოლვილთა სამინისტროს წარმომადგენელი ხვდება

მიანიჭებს თუ არა ლტოლვილის სტატუსს დემირელის კოლეჯის მენეჯერს, დაკავებულ მუსტაფა ემრე ჩაბუქს, ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა სამინისტრო, ჯერ ცნობილი არ არის. ამ საკითხთან დაკავშირებით მას სამინისტროს სტატუსის დამდგენი განყოფილების უფროსი, ია პოჟოვი ადვოკატებთან ერთად ხვდება.

ლტოლვილის სტატუსის მინიჭების პროცედურები ორ ეტაპს მოიცავს - ანკეტის შევსებას და ინტერვიუს, რის შემდეგაც ხდება მიღებული ინფორმაციის დამუშავება. ანალიზის მიმართულებაზე სამუშაო პერიოდი კანონით არის განსაზღვრული და ის მაქსიმუმ ერთ თვეს გულისხმობს. ამის შემდეგ გაირკვევა მიენიჭება თუ არა მუსტაფა ემრე ჩაბუქს ლტოლვილის სტატუსი.

შეგახსენებთ, რომ დემირელის კოლეჯის მენეჯერი მუსტაფა ემრე ჩაბუქი ერთი თვეა, წინა საექსტრადიციო პატიმრობაში იმყოფება. ქართულმა მხარემ ის თურქული მხარის მოთხოვნით დააკავა. თურქეთში მას ტერორიზმთან კავშირში ედავებიან. თავად პატიმრობაში მყოფი პედაგოგი კი ბრალს არ აღიარებს.