საქართველოში ერთნაირსქესიანთა წყვილების სამოქალაქო პარტნიორობის შემოღებასთან დაკავშირებით კამპანია იწყება

დღეს „თანასწორობის მოძრაობა“ კამპანიის „ერთი და იმავე სქესის წყვილების სამოქალაქო პარტნიორობა საქართველოში“ საჯარო პრეზენტაციას გამართავს.

გავრცელებული ცნობით, „თანასწორობის მოძრაობა“ იწყებს კამპანიას, რომლის მიზანია არსებული საკანონმდებლო უთანასწორობის ნაწილობრივი აღმოფხვრა, სამოქალაქო პარტნიორობის ინსტიტუტის შემოღების გზით.

"უკანასკნელი წლების განმავლობაში, სხვადასხვა პოლიტიკური ჯგუფის მიერ აქტიურად განიხილებოდა ქორწინების კონსტიტუციურად რეგულირების საკითხი. აღნიშნული ინიციატივა 2017 წელს ქართულმა ოცნებამ სისრულეში მოიყვანა და ქორწინების ცნება კონსტიტუციაში განისაზღვრა, როგორც მხოლოდ ქალისა და მამაკაცის კავშირი. იმის გათვალისწინებით, რომ ერთი და იმავე სქესის წყვილების ქორწინება ისედაც აკრძალული იყო კანონმდებლობით, ქართული ოცნების მიერ განხორციელებული შესწორება, ცალსახა ჰომოფობიურ სარჩულს ატარებდა და ხელს უწყობს ლგბტ ადამიანების მიმართ ნეგატიური განწყობების კიდევ უფრო გაღვივებას საზოგადოებაში.

აღსანიშნავია ის ფაქტიც, რომ ლგბტ თემს 2017 წლამდე არასოდეს დაუყენებია ქორწინების თანასწორობის საკითხი და ხელისუფლების მხრიდან აღნიშნული თემის წინ წამოწევით მოსახლეობის რეალური პრობლემებიდან ყურადღების გადატანა მოხდა სხვა, საზოგადოებისთვის ნაკლებად პრიორიტეტულ საკითხზე. შედეგად კი სახელმწიფო თავად იქცა დისკრიმინაციის და ჩაგვრის ინიციატორად კონსტიტუციის დონეზე.

არსებულ ვითარებაში „თანასწორობის მოძრაობა“ იწყებს კამპანიას, რომლის მიზანია არსებული საკანონმდებლო უთანასწორობის ნაწილობრივი აღმოფხვრა, სამოქალაქო პარტნიორობის ინსტიტუტის შემოღების გზით. აღნიშნული ინიციატივა ასევე თანხვედრაში მოდის ვენეციის კომისიის დასკვნასთან, რომელიც მოუწოდებს საქართველოს სახელმწიფოს „გაითვალისწინოს ადამიანის უფლებათა ევროპული კონვენციის სტანდარტები და სამართლებრივად აღიაროს სამოქალაქო კავშირები, ან რეგისტრირებული პარტნიორობა ერთი და იმავე სქესის წყვილებისთვის“.

უნდა აღინიშნოს, რომ დღეს არ არის დაცული ლგბტ წყვილის ქონებრივი და პირადი უფლებები. წყვილის, რომელიც თანაცხოვრებას დიდი ხანია ეწევა და რომელსაც საერთო მეურნეობა აქვს, ქონებრივი უფლებები საქართველოს სახელმწიფოს სამართლებრივ სივრცეში არ არსებობს. არ არსებობს მექანიზმი იმისათვის, რომ სახელმწიფომ უზრუნველყოს მათი თანასწორობა და მისცეს სათანადო სამართლებრივი გარანტიები. უფრო კონკრეტულად, თუ ადამიანებმა საკუთარი კავშირი იურიდიულად არ გააფორმეს, მაშინ მათი ურთიერთობა იურიდიულ შედეგებს არ იწვევს. უნდა აღინიშნოს, რომ სამოქალაქო პარტნიორობა არ წარმოადგენს ქორწინების თანასწორ ინსტიტუტს. იგი არ ითვალისწინებს შვილად აყვანის უფლებას და მხოლოდ აწესრიგებს იმ საბაზისო უფლებებს, რომელსაც სახელმწიფო ქორწინებაში მყოფი განსხვავებული სქესის მქონე წყვილებს ანიჭებს", - აღნიშნავენ „თანასწორობის მოძრაობაში“.