პოლიტიკა, რომელიც არის რუსეთის მიმართ, სწორი და ადეკვატურია - მარგველაშვილი

საქართველოს პრეზიდენტი პარლამენტის წინაშე ყოველწლიური მოხსენებით წარსდგა. სიტყვით გამოსვლისას გიორგი მარგველაშვილმა საგარეო-პოლიტიკურ ვითარებაზე ისაუბრა და თქვა, რომ  „როდესაც ვახასიათებთ საგარეო-პოლიტიკურ ვითარებას, ბუნებრივია, მთავარ ფაქტორს უნდა მივაქციოთ ყურადღება  - რუსეთის ფედერაციას.

„ამ მიმართულებით, არაერთხელ აღმინიშნავს, რომ ჩვენს დიპლომატიას ნამდვილად წარმატებულია.  არაღიარების პოლიტიკა რუსეთს ფაქტობრივად ჩაუვარდა და მსოფლიო თანამეგობრობამ ნათლად შეაქცია ზურგი იმ უსამართლობას, რომლის გატანასა და, ასე ვთქვათ, გაყიდვასაც რუსეთი ცდილობდა აფხაზეთისა და ე.წ. სამხრეთ ოსეთის აღიარების მცდელობით.  ჩვენ გვაქვს პოზიტიური დინამიკა, აგრეთვე გაეროში ლტოლვილთა და დევნილთა დაბრუნების შესახებ რეზოლუციასთან მიმართებაში. მთლიანობაში, მსურს ვთქვა, რომ ის პოლიტიკა, რომელიც განსაზღვრული იყო და არის რუსეთის მიმართ და, რომელიც მდგომარეობს სტრატეგიული მოთმინების პოლიტიკაში,  სწორი და ადეკვატურია, იმიტომ, რომ ერთერთი მთავარი მიზანია - არ წამოვეგოთ პროვოკაციას და რუსეთის სახელმწიფოს, რომელიც ამ ეტაპზე საკუთარი განვითარების აგრესიულ ფაზაში იმყოფება, არ მივცეთ შესაძლებლობა, ასე ვთქვათ, გამოაჩინოს ძალა ჩვენს ქვეყაში“, - განაცხადა მარგველაშვილმა.