ლონდონი სკრიპალების მოწამვლაში პუტინს ადანაშაულებს

დიდი ბრიტანეთის უშიშროების მინისტრმა ბენ უოლესმა განაცხადა, რომ რუსეთის პრეზიდენტს ვლადიმერ პუტინს სერგეი და იულია სკრიპალების მოწამვლაში პასუხიმგებლობა ეკისრება. მისი თქმით, სპეცსამსახურებს მითითებებს სწორედ რუსეთის ლიდერი აძლევს.

 „სწორედ მისი მთავრობა აკონტროლებს, აფინანსებს და გზავნის სამხედრო დაზვერვას“, - განუცხადა უოლესმა BBC-ს რადიოსადგურს.

 „საბოლოო ჯამში პასუხიმგებლობა ეკისრება მას (პუტინს), ის ხომ თავისი ქვეყნის პრეზიდენტია, მისი მთავრობა აფინანსებს და მართავს სახელმწიფო დაზვერვის სამმართველოს თავდაცვის სამინისტროს მეშვეობით. არ მგონია, რომ ვინმეს ეთქვას, რომ ის არ აკონტროლებს იმას, რაც მის ქვეყანაში ხდება“, - განაცხადა მინისტრმა.

 სერგეი სკრიპალი და მისი ქალიშვილი იულია ბრიტანეთის ქალაქ სოლსბერიში 5 მარტს მოწამლეს. ბრიტანეთის ხელისუფლების განცხადებით, დაზვერვის ყოფილი პოლკოვნიკი ნერვულ-პარალიტური ნივთიერება „ნოვიჩოკით“ მოწამლეს, რომელიც საბჭოთა კავშირში შეიქმნა.

კრემლი ლონდონის მტკიცებას სკრიპალების მოწამვლის საქმეში რუსეთის ხელმძღვანელობის უმაღლესი წარმომადგენლის მონაწილეობის შესახებ დაუშვებელს უწოდებს. ამის შესახებ რუსეთის პრეზიდენტის პრეს-სამსახურის უფროსმა დიმიტრი პესკოვმა განაცხადა.
„კიდევ ერთხელ ვაცხადებთ, რომ რუსეთის არც უმაღლეს ხელმძვანელობას, არც სხვა თანამდებობის პირებს და არც ოფიციალურ წარმომადგნლებს საერთო არაფერი აქვთ სოლსბერიში მომხდარ მოვლენებთან. რაიმე სახის ვარაუდი ან ბრალდება ამასთან დაკავშირებით დაუშვებელია“, - განაცხადა პესკოვმა.