ბადრი პატარკაციშვილის მკვლელობა სუსტად და უსუსურად არის გამოძიებული - ადვოკატი

ბადრი პატარკაციშვილის მკვლელობის მომზადებაში ბრალდებული გიორგი მერაბიშვილის ადვოკატი, კახა ხვისტანის განცხადებით, პროკურატურის მიერ წარდგენილი ბრალი აბსურდულია. მისივე განმარტებით, ბრალდების მხარემ სასამართლოში საქმე მტკიცებულებების გარეშე წარმართა.

გიორგი მერაბიშვილს გამოძიება პატარკაციშვილის მკვლელობის მომზადების გარდა, სამსახურებრივი უფლებამოსილების გადამეტებასაც ედავება.

"ბუნებრივია ბრალდება არის აბსურდული. ისეთი რეზონანსული მკვლელობის მომზადება, როგორიც ბადრი პატარკაციშვილის მკვლელობის მომზადებაა, ასე სუსტად, ასე უსუსურად არის გამოძიებული. მტკიცებულებების არქონის შემთხვევაში ადამიანისთვის ბრალის წარდგენა და სასამართლოში წარმართვა ყველანაირ სამართლებრივ ნორმას სცილდება. არცერთი პირის პირდაპირი ჩვენება, რომელიც ჩემი დაცვის ქვეშ მყოფს გიორგი მერაბიშვილს ამხელს დანაშაულში, პროკურატურის მიერ გადმოცემულ საქმის მასალებში არ მოიპოვება", - განაცხადა კახა ხვისტანმა.

მისივე ინფორმაციით ბრალდებული მოსამართლის განჩინების საფუძველზე საცხოვრებელ სახლთან დააკავეს.