ბათუმში 55 წლის მამაკაცი 12 წლის გოგონას მიმართ ჩადენილი გარყვნილი ქმედებისთვის დააკავეს

ბათუმში 55 წლის მამაკაცი გარყვნილი ქმედებისთვის დააკავეს. მამაკაცი პოლიციამ 5 ნოემბერს, მოქალაქეების შეტყობინების საფუძველზე აიყვანა. ამის შესახებ ინფორმაციას "აჭარის ტელევიზია" ავრცელებს.

როგორც ირკვევა, მამაკაცმა 12 წლის გოგონას სექსუალური შევიწროება ავტობუსში სცადა.

"იალქანის" ხელმძღვანელი თეონა აბაშიძე, რომელმაც ინფორმაცია შესაბამის უწყებას მიაწოდა, ყვება, რომ ორგანიზაციას გოგონას დედამ მიმართა.

''ბავშვის დედა ყვება, რომ გოგონა მუნიციპალური ტრანსპორტით მგზავრობდა. ის სკოლიდან სახლში ბრუნდებოდა, რა დროსაც 55 წლამდე ასაკის კაცმა, მის მიმართ ჩაიდინა გარყვნილი ქმედება. ავტობუსში იყვნენ სხვა არასრულწლოვნები და კიდევ ერთი მამაკაცი, რომელსაც მოზარდებმა დახმარება სთხოვეს. კაცმა ავტობუსიდან ჩასვლა მოასწრო, შესაბამისად იმ წუთებში პოლიციის გამოძახება ვერ მოხერხდა. შესაბამის უწყებაში შეტყობინება მოგვიანებით ჩვენმა ორგანიზაციამ გააგზავნა", - ამბობს თეონა აბაშიძე.

მისივე ინფორმაციით, კაცის დაკავების შემდეგ 12 წლის გოგონა სკოლაში დაბრუნებას აპირებს.

"მანამდე სასწავლო დაწესებულებაში მარტო წასვლის ეშინოდა და ითხოვდა გვერდით ვინმე თანმხლები პირი ჰყოლოდა. ამ ფაქტის გამო შეშინებული იყო და ჰქონდა ძლიერი ემოციური ფონი", - აცხადებს აბაშიძე.

შინაგან საქმეთა სამინისტროს ინფორმაციით, მომხდარზე გამოძიება სსკ-ს 141-ე მუხლით მიმდინარეობს.