სექსუალურ შევიწროებაში დადანაშაულებული ლექტორი ბათუმის საკრებულოს კომისიის თავმჯდომარის თანამდებობას ტოვებს

ბათუმის სახელმწიფო უნივერსიტეტის ლექტორი და ბათუმის საკრებულოს წევრი ომარ მახარაძე, რომელსაც სტუდენტი გოგონა სექსუალურ შევიწროებაში ადანაშაულებს, საკრებულოს იურიდიულ და საპროცედურო საკითხთა კომისიის თავმჯდომარის თანამდებობასა და ფრაქცია „ქართული ოცნება - მრეწველების“ რიგებს ტოვებს. აღნიშნული განცხადებით, ომარ მახარაძემ საკრებულოს თავმჯდომარეს დღეს მიმართა. ამის შესახებ ინფორმაციას ბათუმის საკრებულოს პრესსამსახური ავრცელებს.

„იმისათვის, რომ დადგინდეს ჭეშმარიტება და არავინ იფიქროს, რომ ჩემი მხრიდან ადგილი ექნება რაიმე სახით არამართლზომიერი ჩარევის მცდელობას, მივიღე გადაწყვეტილება, რომ დავტოვო საკრებულოში დაკავებული თანამდებობა და ფრაქციის რიგები სიმართლის დადგენამდე. იმედი მაქვს, შესაბამისი ორგანოები დაადგენენ ჭეშმარიტებას, რადგან ჩემთვის ამ საქმის მორალურ მხარეს აქვს უპირატესი მნიშვნელობა“, - აცხადებს ომარ მახარაძე. 

მოქმედი კანონმდებლობის და ბათუმის საკრებულოს რეგლამენტის შესაბამისად, ომარ მახარაძის განცხადების თაობაზე გადაწყვეტილებას საკრებულო უახლოეს სხდომაზე მიიღებს.

ბათუმის სახელმწიფო უნივერსიტეტის 19 წლის სტუდენტმა,  ომარ მახარაძე სექსუალურ  შევიწროებაში დაადანაშაულა და განაცხადა, რომ ლექტორი მას "თამამი ფოტოების გაგზავნას სთხოვდა".

მახარაძემ ბრალდება უარყო და განაცხადა, რომ მას ICloud-ი გაუტეხეს და მესიჯები სტუდენტისთვის მას არ გაუგზავნია.

გამოძიება სისხლის სამართლის კოდექსის 150-ე მუხლით მიმდინარეობს, რაც იძულებას გულისხმობს და ისჯება ჯარიმით ან გამასწორებელი სამუშაოთი ვადით ერთ წლამდე, ან იმავე ვადით თავისუფლების აღკვეთით. საკითხს საკუთარი ინიციატივით სწავლობს საქართველოს სახალხო დამცველის აპარატიც.