ირანში ჰომოსექსუალი სახალხოდ ჩამოახრჩვეს

ირანში სახალხოდ ჩამოახრჩვეს მამაკაცი, რომელსაც ბრალი ჰომოსექსუალობის კანონის დარღვევაში დასდეს. წერს The Jerusalem Post-ი. ეს წლის დასაწყისში მოხდა, თუმცა ინფორმაცია მხოლოდ ახლახან გავრცელდა.

გამოცემის ცნობით, 31 წლის ირანელი მამაკაცი, რომლის ვინაობაც არ სახელდება, სიკვდილით ქალაქ კაზერუნში დასაჯეს (ფარსის პროვინცია). ის მამაკაცებს შორის სექსუალური ურთიერთობის შესახებ კანონის დარღვევაში და ორი 15 წლის მოზარდის გატაცებაში დაადანაშაულეს. მედიის ინფორმაციით, ქალაქის მოსახლეობამ კმაყოფილება გამოთქვა მამაკაცის სიკვდილით დასჯის გამო და სასამართლო ორგანოებს მადლობა გადაუხადა.

ეს ჰომოსექსუალობის გამო ადამიანის სიკვდილით დასჯის პირველი შემთხვევა არ არის. 2016 წელს ირანის ცენტრლურ ნაწილში სიკვდილით დასაჯეს ახალგაზრდა მამაკაცი. ის ასევე გაასამართლეს მამაკაცთან სექსუალური კავშირისთვის ჯერ კიდევ მოზარდობის პერიოდში. ასევე ცნობილია, 2011 წელს სამი ლგბტ პირის სასიკვდილო განაჩენის შესახებ.

ირანი 70 ქვეყნიდან ერთ-ერთია, სადაც ერთნაირსქესიანთა ურთიერთობა სისხლის სამართლის დანაშაულად მიიჩნევა. ამასთან, მსგავსი დანაშაულისთვის, სიკვდილით დასჯის გარდა, ადამიანს შესაძლოა, მიესაჯოს პატიმრობა, ან გაროზგვა.