საქართველოს დროშას მაინც არ უყურებთ ხანდახან, ხალხო? - მიხეილ სააკაშვილი

საქართველოს ყოფილი პრეზიდენტი მიხეილ სააკაშვილი 29 სექტემბერს „მთავარი არხისთვის“ მიცემულ ინტერვიუსთან დაკავშირებით განმარტებას აკეთებს. სააკაშილმა ინტერვიუში თქვა, რომ თავად არის „მრწამსით ქრისტიანი“ ხოლო, გიგა ბოკერია ტრადიციებთან მებრძოლი ანტიქრისტიანია.

სააკაშილის ინტერვიუს დიდი კრიტიკა მოჰყვა, რის გამოც მან განმარტებისთვუს ვიდეომიმართვა გაავრცელა.

“მინდა, ვთქვა იმ ხალხის გასაგონად, ვისაც გაუკვირდა ჩემი გუშინდელი ხაზგასმა ჩვენს ქრისტიანულ ფასეულობებზე. საქართველოს დროშას მაინც არ უყურებთ ხანდახან, ხალხო? რა თქმა უნდა, ეს არის არა მხოლოდ ჩვენი ფუნდამენტური ღირებულება, არამედ ეს არის ის, რასაც ჩვენი ხალხის აბსოლუტური უმრავლესობა ფიქრობს და ემხრობა და მე მოვუწოდებ ყველას, რომ დიახ, ჩვენ ვეფუძნებით ჩვენს ტრადიციებს, ჩვენ ვეფუძნებით ჩვენს წარსულში საუკეთესოს, რაც არის და ამავე დროს, თავის დროზე, ჩვენ შევთავაზეთ ყველაზე ინოვაციური პროგრამა ქართველებს და საქართველო გავხედოთ მსოფლიოს ნომერ პირველი ინოვატორი და ახლაც გვაქვს ასეთი გეგმები, რომლებიც საქართველოს ისევ გაიყვანს მოწინავე პოზიციებზე მსოფლიოში და ერთი მეორეს არ ეწინააღმდეგება. ჩვენ ვართ ტრადიციულები და ჩვენ ვართ ძალიან, ძალიან ინოვაციურები და ძალიან გაბედულები ჩვენს ქმედებებში. და მხოლოდ პროექტებს კი არ ვაკეთებთ, ჩვენ გვჯერა ამისი და ჩვენ გაკეთებული გვაქვს და გავაკეთებთ ასევე ბოლომდე. ამაში ვარ აბსოლუტურად დარწმუნებული. ასე რომ, ყველაფერი კარგად იქნება. დარწმუნებული ვარ, ჩვენი ხალხი აბსოლუტურად სწორად ხვდება ყველაფერს. ყველა პოლიტიკოსს, კოლეგას მინდა, მოვუწოდო - იყავით უფრო ახლოს საკუთარ ხალხთან, მხოლოდ მოიგებთ”, - თქვა სააკაშილმა ვიდეომიმართვაში.