საკმაოდ ძლიერი შეტაკება იყო - გიორგი ხარაიშვილი თავს კარგად გრძნობს

საქართველოს ეროვნულმა ნაკრებმა ევრო 2020-ის საკვალიფიკაციო ეტაპის მეშვიდე შეხვედრა გიბრალტართან სტუმრად გამართა და  3:2 მოიგო.

შეხვედრის 56-ე წუთზე გიორგი ხარაიშვილი და ჯეკ სერჯანტი ერთმანეთს შეეჯახნენ. ქართველმა ფეხბურთელი დაშავდა და თამაშის გაგრძელება ვეღარ შეძლო. ის კლინიკაში გადაიყვანეს და შესაბამისი კვლევები ჩაუტარეს.  ამჟამად, ხარაიშვილი თავს კარგად გრძნობს და უკვე მომდევნო თამაშებზე ფიქრობს. ხარაიშვილის კომენტარს საქართველოს ფეხბურთის ფედერაცია „ფეისბუქის“ გვერდზე აქვეყნებს.

"პირველ რიგში, აღვნიშნავ, რომ თავს კარგად ვგრძნობ, რაც შეეხება ჩემ თამაშს, რა თქმა უნდა, სასიხარულოა საკვალიფიკაციო ეტაპზე თამაში და სადებიუტო გოლი, ორმაგად საპასუხისმგებლოა. ნაკრებს ვულოცავ გამარჯვებას და სამი ქულის მოპოვებას.

რაც შეეხება შეჯახების მომენტს, საკმაოდ ძლიერი შეტაკება იყო, შემდეგ გადამიყვანეს ჰოსპიტალში ჩვენი გუნდის ექიმთან ერთად, შესაბამისი კვლევები ჩამიტარდა. საბედნიეროდ ყველაფერი კარგად არის და უკვე მომდევნო თამაშებზე ვფიქრობ.

მადლობა ნაკრების სამედიცინო ჯგუფს, ჩემ გულშემატკივარს, ვინც გოლის და შეჯახების ეპიზოდის შემდეგ გამომეხმაურა და მამხნევებდა“.- განაცხადა ხარაიშვილმა.