ჟურნალისტი, რომლიც ტრამპს გაუპატიურებაში ადანაშაულებდა, მას სასამრთლოში უჩივის

ჟურნალისტი ჯინ კეროლი, რომელიც აშშ-ის პრეზიდენტს დონალდ ტრამპს 20 წლის წინ მომხდარ სექსუალურ ძალადობაში ადანაშაულებდა, სასამართლოში რეპუტაციის შელახვისთვის შეერთებული შტატების ლიდერს უჩივის. იუწყება ტელეარხი NBC

ტელეარხის ცნობით, საჩივარი პატივისა და ღირსების შელახვის შესახებ კეროლმა ნიუ-იორკის სასამართლოში შეიტანა. მოსაჩივრე ამტკიცებს, რომ გაუპატიურებაში დადანაშაულების შემდეგ  ტრამპს ჰქონდა არასათანადო რეაქცია და ცდილობდა დაეკავშირებინა ის წიგნების გაყიდვასა პოლიტიკურ მოტივებთან, ამან კი ჟურნალისტის თქმით, მის რეპუტაციას ზიანი მიაყენა.

კეროლი ამბობს, რომ პრეზიდენტის სიტყვებმა „მიაყენეს ემოციური ტკივილი და ტანჯვა, დაუზიანეს რეპუტაცია და მიაყენეს არსებითი პროფესიული ზიანი“.

საჩივრის შესახებ საუბრისას კეროლმა ტელეარხთან აღნიშნა, რომ ამას თითოეული ქალის ინტერესების დაცვისთვის აკეთებს, რომლებიც სექსუალური შევიწროების შედეგად დაზარალდნენ. „იმის მიუხედავად, რომ არ შემიძლია დონალდ ტრამპს პასუხი ვაგებინო იმისთვის, რომ მან 20 წლის წინ გამაუპატიურა, შემიძლია მოვითხოვო პასუხი იმ სიცრუეზე, რაც მან განაცხადა“, - თქვა კეროლმა.

ჟურნალისტმა ჯინ კეროლმა, რომელიც ქალთა ჟურნალში Elle  სვეტის ავტორია, ადრე განაცხადა, რომ 90-იან წლებში ტრამპი მის გაუპატიურებას ცდილობდა სავაჭრო ცენტრ Bergdorf Goodman-ის გასახდელში. კეროლმა ამის შესახებ თავის წიგნში დაწერა. წიგნიდან ამონარიდი ჟურნალ New York Magazine-ში დაიბეჭდა. ჟურნალისტის თქმით, მას პოლიციაში არ განუცხადებია და ინციდენტის შესახებ მხოლოდ ახლო მეგობრებს უამბო. მან ასევე აღნიშნა, რომ არ აქვს ნივთიერი მტკიცებულებები და ვიდეოჩანაწერები, რაც ჟურნალმაც დაადასტურა.

ტრამპი ბრალდებას კატეგორიულად უარყოფს და მას სიცრუეს უწოდებს. პრეზიდენტი ირწმუნება, რომ კეროლს არ შეხვედრია და ამბობს, რომ კეროლი მასზე თავდასხმებით ცდილობს თავისი ახალი წიგნი გაყიდოს.

ტრამპი სექსუალურ შევიწროებაში 20-ზ მეტმა ქალმაც დაადანაშაულა, თუმცა არცერთი საქმე არ გამოძიებულა და არც სასამართლოში დამტკიცებულა. ერთ-ერთი ყველაზე ხმაურიანი იყო პორნომსახიობ სტორმი დენიელსის საქმე. თუმცა ნიუ-იორკის ფედერალურმა სასამართლომ მისი სარჩელი არ მიიღო ტრამპის წინააღმდეგ ცილისწამების გამო.

ტრამპი უარყოფს ბრალდებებს სექსუალურ შევიწროებასა და ცოლის ღალატში. თუმცა 2016 წელს წინაასარჩენო კამპანიის დროს მან ბოდიში მოიხადა შემთხვევით გავრცელებული ჩანაწერის გამო, სადაც ის ტრაბახობს იმით, რომ ქალები მას უფლებას აძლევენ ხელით შეეხოს ინტიმურ ადგილებზე, რადგან მას „ვარსკვლავად“ მიიჩნევენ.