საქართველოში ენების ევროპული დღე აღინიშნა

26 სექტემბერს, მოსწავლე-ახალგაზრდობის ეროვნულ სასახლეში, ენების ევროპული დღე აღინიშნა. ღონისძიებას, რომლის ორგანიზატორიც  ევროკავშირის კულტურული დაწესებულებების გაერთიანებაა (EUNIC),  7-დან 14 წლამდე მოსწავლეები ესწრებოდნენ.

ღონისძიების ფარგლებში, ორგანიზატორებმა ბავშვებს მრავალენოვანი თეატრალური წარმოდგენა შესთავაზეს. მოსწავლეებმა ასევე მონაწილეობა მიიღეს ცეკვის სახელოსნოებში, სიმღერის მრავალენოვან კონკურსში, თამაშებსა და კონკურსებში. გამარჯვებულებს გადაეცათ სამახსოვრო პრიზები.

ღონისძიებას დაესწრო საგარეო საქმეთა მინისტრის მოადგილე ხათუნა თოთლაძე, რომელმაც  მისასალმებელი სიტყვით მიმართა მონაწილეებს.

ენების ევროპული დღე ევროპის საბჭოს გადაწყვეტილებით, 2001 წელს დაარსდა და მსოფლიოს მრავალ ქვეყანაში აღინიშნება. უკვე მესამე წელია, რაც საქართველოს საგარეო საქმეთა სამინისტროს ინიციატივით და საზღვარგარეთ საქართველოს დიპლომატიური წარმომადგენლობების ძალისხმევით, ქართული ენა წარმოდგენილია ენების ევროპული დღისადმი მიძღვნილ ღონისძიებებზე სხვადასხვა ქვეყანაში.