უპასუხისმგებლო პოლიტიკოსების გამო უკრაინელ და ქართველ ხალხებს შორის ძმობას კითხვის ნიშნის ქვეშ არ დავაყენებთ - გახარია

უპასუხისმგებლო პოლიტიკოსების გამო, უკრაინელ და ჩვენს ხალხებს შორის ძმობას კითხვის ნიშნის ქვეშ ვერ დავაყენებთ, - ამის შესახებ საქართველოს პრემიერ-მინისტრმა გიორგი გახარიამ განაცხადა.

მისი თქმით, უკრაინიდან ელჩს მხოლოდ კონსულტაციებისთვის გამოიწვევენ, რათა შეთანხმდნენ, როგორ დაიცვან სტრატეგიული ურთიერთობები ავანტიურისტი პოლიტიკოსებისგან.

„ქართველები და უკრაინელები ვართ არამხოლოდ სტრატეგიული პარტნიორები, არამედ ჩვენ გვაკვშირებს დიდხნიანი თანამშრომლობა. ჩვენს პარტნიორობას და ხალხებს შორის ძმობას ცალკე აღებული უპასუხისმგებლო პოლიტიკოსების გამო კითხვის ნიშნის ქვეშ არ დავაყენებთ. ჩვენ ელჩს გამოვიწვევთ მხოლოდ კონსულტაციებისთვის, რათა შევთანხმდეთ, როგორ დავიცვათ ეს ურთიერთობები ამ ავანტიურისტი პოლიტიკოსებისგან. ჩვენ და მათ შორის მეც ეს განწყობა არ დაგვიმალავს. რა თქმა უნდა, გაუგებარია, როდესაც სტრატეგიული პარტნიორის სასამართლო სისტემის მიერ მძიმე დანაშაულებზე გასამართლებული ადამიანი ინიშნება რაღაც თანამდებობაზე, თუნდაც ეს არ იყოს მაღალი თანამდბეობა. თქვენ იცით, ოდესის შემდეგ რა ძალისხმევა დაგვჭირდა, რომ ჩვენი ქვეყნის ურთიერთობები დაგვებრუნებინა სტრატეგიული მოკავშირეობის ჩარჩოში. პირადად ვიყავი ჩასული კიევში. ახლა ელჩს თბილისში ვიწვევთ სწორედ იმიტომ, რომ ამ ავანტიურისტებმა ორ ქვეყანას შორის სტრატეგიული ურთიერთობები რისკის ქვეშ არ დააყენონ “, - განაცხადა გიორგი გახარიამ.