აჭარა „Adventure 2016”-ზე ცალკე სტენდითაა წარმოდგენილი

აჭარის ტურიზმისა და კურორტების დეპარტამენტი ლიტვაში, ვილნიუისის საერთაშორისო გამოფენაში „Adventure 2016”-ში მონაწილეობს. როგორც დეპარტამენტში აცხადებენ, აჭარა გამოფენაზე ცალკე სტენდითაა წარმოდგენილი, სადაც მისულ სტუმრებს, გარდა რეგიონის ტურისტული პოტენციალის ამსახველი მასალებისა ქართული ღვინის, ჩურჩხელისა და ტკბილეულის დაგემოვნების საშუალება მიეცემათ.

აჭარის ტურიზმის დეპარტამენტი გამოფენის ფარგლებში რეგიონის ტურისტული პოტენციალის პრეზენტაციას გეგმავს ლიტველი ტურ სააგენტოების, მედია საშუალებებისა და დიპლომატიური კორპუსის წარმომადგნელებისთვის. გარდა ამისა, გამოფენაზე აჭარის ერთკვირიანი საგზურის გათამაშებაც იგეგმება, რომელშიც მგზავრობა, ღამისთევა და კვება შევა. გამოფენა დღეს გაიხსნა და 24 იანვარს დასრულდება.

აღსანიშნავია, რომ აჭარის ტურიზმის დეპარტამენტი ვილნიუსის საერთაშორისო გამოფენაში უკვე მესამედ მონაწილეობს. დეპარტამენტი ლიტვაში მარკეტინგულ და PR კამოპანიებს 2013 წლიდან ახორციელებს, რის შედეგადაც წლიდან წლამდე იზრდება რეგიონში შემომსვლელ ლიტველ ვიზიტორთა რაოდენობაც. 2015 წელს 2014 წელთან შედარებით აჭარაში ლიტვადან 2,8 %-ით მეტი ვიზიტორი შემოვიდა.

შეგახსენებთ, რომ რეგიონის ტურისტული პოტენციალის პოპულარიზაციისა და ვიზიტორთა მოზიდვის მიზნით აჭარის ტურიზმის დეპარტამენტი მიმდინარე წელს 16 საერთაშორისო გამოფენაში გეგმავს მონაწილეობას, მათ შორის გერმანიაში, დუბაიში, ჩინეთში, იაპონიასა და სამხრეთ კორეაში.