ანიტა რაჭველიშვილი განზრახ და შეგნებულად აზიანებს საკუთარი ქვეყნის რეპუტაციას - სალომე ზურაბიშვილი

საქართველოს პრეზიდენტი სალომე ზურაბიშვილი საოპერო მომღერალ ანიტა რაჭველიშვილს ქვეყნის რეპუტაციის დაზიანების მცდელობაში ადანაშაულებს.

ანიტა რაჭველიშვილმა Facebook-ში გამოაქვეყნა პოსტი, სადაც ის სალომე ზურაბიშვილს "კრიმინალს" და "ქვეყნის მოღალატეს" უწოდებს. რაჭველიშვილი წერს, რომ ზურაბიშვილი "არ უნდა იყოს იმ ღირსეული ქალბატონების სიაში ვისზეც ანისტონმა დაპოსტა!". საუბარია ჰოლივუდის მსახიობ ჯენიფერ ენისტონის მიერ სოციალურ ქსელ Instagram-ში ქალი ლიდერების ფოტოების გამოქვეყნებაზე, რომელთა შორის საქართველოს პრეზიდენტი სალომე ზურაბიშვილიც არის.

"სამწუხაროა, რომ ქალი, რომელიც მსოფლიო საოპერო ხელოვნებაში საქართველოს სახეს წარმოადგენს, ღიად ესხმის თავს და შეურაცხყოფას აყენებს საქართველოს პირველ ქალ პრეზიდენტს, რითაც განზრახ და შეგნებულად აზიანებს საკუთარი ქვეყნის რეპუტაციას.

იმ დროს, როცა ცნობილი მსახიობი ჯენიფერ ენისტონი მსოფლიოში ცვლილებებისა და გადაწყვეტილებების მიღების პროცესში ქალთა როლის გაძლიერებისადმი მხარდაჭერას გამოხატავს, ქართველი მეცოსოპრანო საქართველოს პრეზიდენტის მიმართ სიძულვილის ენის გამოყენებით გამოთქმული დაუსაბუთებელი ბრალდებებით აკნინებს სწორედ ქალთა ძალისხმევას, რაც მიუღებელია", - ნათქვამია პრეზიდენტის ადმინისტრაციის მიერ გავრცელებულ განცხადებაში.