ვაქცინაციის შემდეგ ანაფილაქსიური შოკი კიდევ ერთ მედიკოსს განუვითარდა

თბილისში ვაქცინაციის შემდეგ ანაფილაქსიური შოკი კიდევ ერთ მედიკოსს განუვითარდა. ინფორმაციას დაავადებათა კონტროლის ცენტრის დირექტორი ამირან გამყრელიძე ადასტურებს.

"პერსონალურ ინფორმაციას ვერ გავცემ. ახალგაზრდა ადამიანია. გიდასტურებთ, რომ გვერდითი მოვლენების კომიტეტში შესულია ინფორმაცია. ერთ-ერთ საავადმყოფოშია ეს ახალგაზრდა ქალბატონი. იქ კლინიკამ დაწერა ანაფილაქსიური შოკი, მაგრამ იმ მონაცემებით ჯერჯერობით საბოლოო გადაწყვეტილება უნდა მიიღოს გვერდითი მოვლენების კომიტეტმა - იყო თუ არა იქ ანაფილაქსია. იქ იყო მწვავე ალერგიული რეაქცია, იმიტომ რომ თვითონ ანაფილაქსია მიეკუთვნება მწვავე ალერგიული რეაქციების რიგს, მაგრამ იყო თუ არა იქ შოკი ეს დასადასტურებელია. ის ახლა კარგად არის", - განაცხადა ამირან გამყრელიძემ.

ბოკერიას სახელობის კლინიკის ხარისხის სამსახურის ხელმძღვანელი შორენა კიწმარიშვილი ამბობს, რომ ამ შემთხვევაში გამოვლინდა ალერგიული რეაქცია და მდგომარეობა ანაფილაქსიურ შოკამდე არ მისულა.

"17 რიცხვში აიცრა ჩვენი კოლეგა, რომელსაც ვაქცინაციიდან დაახლოებით 15-20 წუთში გამოუვლინდა ალერგიული ხასიათის გამონაყარი, ჰქონდა რაღაც მოუსვენრობა, შფოთვა, რის გამოც პირველი პროტოკოლის შესაბამისად, შესაბამისი ღონისძიებები იქნა გატარებული, მდგომარეობა გაუმჯობესდა, თავს დამაკმაყოფილებლად გრძნობს და შესაბამისად, გაეწერა ბინაზე”, - თქვა კიწმარიშვილმა.