ეს ჩვენთვის არ არის მისაღები. მისაღებია ის, რასაც მოვაწერეთ ხელი - ირაკლი ქადაგიშვილი

საპარლამენტო უმრავლესობის დეპუტატი, ირაკლი ქადაგიშვილი "პირველ არხთან" საუბრისას აცხადებს, რომ მმართველი პარტიისთვის შარლ მიშელის ახალი დოკუმენტი მისაღები არ არის და მისაღებია ის, რასაც "ქართულმა ოცნებამ" ხელი 16 აპრილს მოაწერა.

ქადაგიშვილის განცხადებით, პატიმრებთან დაკავშირებით დოკუმენტში არსებულ ჩანაწერზე და 43-პროცენტზე მან ინფორმაცია ამ საღამოს "ექსპრომტად შეიტყო".

"ჩვენ ვფიქრობთ, რომ ამ შემთხვევაში დავრჩებით ჩვენ პოზიციაზე. ამაზე ალბათ, იქნება უკვე ხვალ მსჯელობა. ახლა დღეს საღამოს ექსპრომტად ვიგებ ამ ინფორმაციას. ჩვენ დავრჩებით ალბათ იმ პოზიციაზე, რა პოზიციაც ჩვენი ინიციატივით გამოვხატეთ და არავის უთხოვია ჩვენთვის არც 43% და არც 25%. ჩვენ თვითონ ვთქვით ეს რიცხვიც, ეს დათქმაც და აქ ახლა ერთი-ორ პროცენტზე ვაჭრობა, ცოტა უხერხულად მეჩვენება. რაც შეეხება პატიმრებთან დაკავშირებულ საკითხს, აქაც ჩვენ იმ დოკუმენტიდან გამომდინარე ნათლად ვთქვით, რომ თუ მოხდება მელიას მხრიდან გირაოს გადახდა, მზადყოფნა გამოვთქვით, რომ პოლიტიკური ამინისტია შედგეს 20 ივნისის მოვლენების გარშემო.

არაფერი საკონსულტაციო ვფიქრობ აქ აღარ არის, რადგან ყველაფერი ჩვენი მხრიდან ცალსახად და პლუს კიდევ უფრო მეტად იქნება შემოტანილი – 40% შემოვიტანეთ და სამ პროცენტზე არის ვაჭრობაა? გაურკვეველია.

ეს ჩვენთვის არ არის მისაღები. მისაღებია ის, რასაც ჩვენ მოვაწერეთ ხელი. უფრო კონკრეტულები ვიქნებით, როდესაც შეკრება გაიმართება ხვალ“,- განაცხადა ქადაგიშვილმა.

დღეს, ევროპული საბჭოს პრეზიდენტმა, შარლ მიშელმა პოლიტიკურ პარტიებს ახალი დოკუმენტი შესთავაზა.