3 პოლიციელი დაშავდა, ორივე მხარეს არიან დაშავებულები - დმანისის მაჟორიტარი

ბოლნისის, დმანისის, თეთრიწყაროსა და წალკის მაჟორიტარი დეპუტატის, ქართული ოცნების წევრის, გოგი მეშველიანის ინფორმაციით, დმანისში 17 მაისს მომხდარი დაპირისპირებისას, სამი პოლიციელი დაშავდა. ამის შესახებ მან რუსეთავი 2 -ის ეთერში განაცხადა.

მისივე თქმით დაშავებულები არიან ორივე მხარეს. მეშველიანი ამბობს, რომ "პოლიციამ ყველა ზომა მიიღო, რომ დასახლებაში დაწყებული კონფლიქტი დროულად ყოფილიყო აღკვეთილი".

"მე ვფიქრობ, პოლიციამ იმუშავა კარგად, რომ ეს დაპირისპირება უფრო მძიმე შედეგებით არ დასრულებულიყო, მათ შორის, სამი პოლიციელია დაშავებული, დაშავებულები არიან ორივე მხარეს, თუმცა, მადლობა ღმერთს, რომ ჩვენ არ გვაქვს უფრო მძიმე, ლეტალური შედეგი". – თქვა მეშველიანმა.

გუშინ დმანისში, ადგილობრივები დაუპირისპირდნენ ერთმანეთს, რაც ჯგუფურ ძალადობაში გადაიზარდა. დაპირისირება დღესაც გაგრძელდა. დღის განმავლობაში მოქალაქეთა ჯგუფები ერთმანეთს ქალაქის სხვადასხვა ადგილასა და შესასვლელში რამდენჯერმე დაუპირისპირდნენ. ადგილზე მობილიზებულები არიან საპოლიციო ძალები.