ავღანეთის ახალ მთავრობას, დროებითი პრემიერის რანგში, უხელმძღვანელებს "თალიბანის" ერთ-ერთი დამფუძნებელი მულა მოჰამედ ჰასან ახუნდი

ექსტრემისტულმა დაჯგუფებამ "თალიბანმა", რომელმაც 15 აგვისტოს ხელთ იგდო ავღანეთი, ქვეყნის ახალი დროებით მთავრობის შემადგენლობა დაასახელა.

მთავრობის წევრთა ვინაობა "თალიბანის" სპიკერმა ზაბიულა მუჯაჰიდმა გაასაჯაროვა.

ავღანეთის ახალ მთავრობას, დროებითი პრემიერ-მინისტრის რანგში, უხელმძღვანელებს "თალიბანის" ერთ-ერთი დამფუძნებელი და გაეროს შავ სიაში მყოფი მულა მოჰამედ ჰასან ახუნდი.

ჰასან ახუნდის შესახებ ბევრი არაფერია ცნობილი. 1990-იან წლებში "თალიბანის" წინა რეჟიმის დროს, იგი ყანდაარის პროვინციის გუბერნატორი იყო. სავარაუდოდ, ის 60 წლის უნდა იყოს. "თალიბანის" წყაროზე დაყრდნობით, სააგენტო Reuters- წერს, რომ ჰასან ახუნდი თალიბებს შორის უდიდესი პატივისცემით სარგებლობს.

ზაბიულა მუჯაჰიდის განცხადებით, პრემიერ-მინისტრის მოადგილე იქნება "თალიბანის" ერთ-ერთი დამფუძნებელი და მოძრაობის პოლიტიკური ფრთის ლიდერი მოლა აბდულ ღანი ბარადარი.

შინაგან საქმეთა მინისტრის პოსტს შეერთებული შტატების გამოძიების ფედერალური ბიუროს მიერ ძებნილი სირაჯუდინ ჰაყანი ჩაიბარებს. ჰაყანი "თალიბანის" ერთ-ერთი ლიდერი და უზენაესი მეთაურის, ჰიბატულა ახუნძადას მოადგილეა.

სირაჯუდინ ჰაყანი არის "თალიბანის" ერთ-ერთი განშტოების "ჰაყანის ქსელის" ლიდერი. სწორედ ამ ქსელს უკავშირდება ავღანეთში სამთავრობო ძალებისა და მათი დასავლელი მოკავშირეების წინააღმდეგ განხორციელებული ყველაზე ძალადობრივი თავდასხმები. "ჰაყანის ქსელი" აშშ-ის მიერ გამოცხადებულია, როგორც ტერორისტული ორგანიზაცია.

თავდაცვის მინისტრი იქნება მოჰამედ იაყუბი, თალიბანის დამფუძნებლის, მოლა მუჰამედ ომარის ვაჟი. ხოლო საგარეო საქმეთა მინისტრის მოვალეობას ამირ ხან მუთაქი შეასრულებს.

BBC-ის ინფორმაციით, ჯერ კიდევ უცნობია, თუ რა როლს იკისრებს ავღანეთის მმართველობაში "თალიბანის" ერთ-ერთი დამფუძნებელი და უზენაესი ლიდერი მოლა ჰიბატულა ახუნძადა.