რუსეთი, შესაძლოა, ესტონეთს თავს დაესხას - თავდაცვის ძალების მეთაური

რუსეთი, შესაძლოა, ესტონეთს თავს დაესხას უახლოესი რამდენიმე წლის განმავლობაში, - განაცხადა ესტონეთის თავდაცვის ძალების მეთაურმა მარტინ ჰერემმა ტელეარხ ETV-ს ეთერში.

 „საუბარია იმაზე, რომ რუსეთი წარმოადგენს საფრთხეს, რომ ის შესაძლოა, თავს დაესხას ესტონეთს. მაგრამ როდის? წელს? მომავალ წელს? სამ წელიწადში? უნდა გვესმოდეს, რომ ეს, შესაძლოა, მოხდეს უახლოესი რამდენიმე წლის განმავლობაში“, - განაცხადა ჰერემმა.

ჰერემის ვერსიით, შესაძლოა, საუბარი იყოს სამხედრო ძალების დროში შეზღუდულ შეჭრაზე, რომლისთვისაც დამახასიათებელი იქნება ჰიბრიდული ომის ელემენტები.

თავდაცვის ძალების მეთაური ამტკიცებს, რომ მოსკოვის მიზანია ბალტიის რეგიონში არასტაბილურობის კერა შექმნას. მისივე თქმით, ტალინი, რაც შეიძლება კარგად  უნდა მოემზადოს მსგავსი სცენარისთვის.

რუსეთის საგარეო საქმეთა უწყებას ჰერემის განცხადებაზე კომენტარი არ გაუკეთებია.

რუსეთან ფართომასშტაბიანი ომი არ გამორიცხა უკრაინის პრეზიდენტმა ვოლოდიმირ ზელენსკიმაც.

 „ეს რუსეთის უდიდესი შეცდომა იქნება“, - განაცხადა ზელენსკიმ და აღნიშნა, რომ ასეთი ნაბიჯის შემდეგ აღარ იარსებებს რუსეთის, უკრაინისა და ბელარუსის სამეზობლო.  

რუსეთის საგარეო საქმეთა სამინისტროს ოფიციალურმა წარმომადგენელმა მარია ზახაროვამ უკრაინის პრეზიდენტის საპასუხოდ Telegram-ზე დაწერა, რომ „ზელენსკის განცხადებები სულ უფრო და უფრო შორდება რეალობას“.