ბათუმში კორპუსის ჩამონგრევის მიზეზად საყრდენი კედლის გამოცლა განიხილება - ვახტანგ გომელაური

ბათუმში კორპუსის ჩამონგრევის მიზეზად საყრდენი კედლის გამოცლა განიხილება, - ამის შესახებ შინაგან საქმეთა მინისტრმა ჟურნალისტებთან, ბათუმში, კორპუსის ნაწილის ნგრევის შესახებ საუბრისას განაცხადა.

გომელაურის განცხადებით, კორპუსის ნანგრევებში დაახლოებით 10-15 ადამიანია მოყოლილი.

"წინასწარი ინფორმაციით, იყო რამდენიმე ვერსია, გაზის ვერსიაც განიხილებოდა. ჩვენი ინფორმაციით, ქვემოთ მიმდინარეობდა სარემონტო სამუშაოები, მესაკუთრე აკეთებდა. შეიძლება, ეს იყოს მიზეზი საყრდენი კედლის გამოცლის ან კიდევ სხვა მიზეზი. წინასწარ ვერ ვიტყვით. გამოძიება დავიწყეთ და დავადგენთ, რამ გამოიწვია ნგრევა. გამოძიება მიდის და თუ დადგინდება, რა თქმა უნდა, პასუხისგებაში მიეცემიან ეს ადამიანები. გამოძიება მიმდინარეობს 240-ე მუხლის მეორე ნაწილით. დაკავებული არავინ არ არის, ხალხი მიყვანილია, გამოკითხვა მიმდინარეობს", - განაცხადა ვახტანგ გომელაურმა.