მიხეილ სააკაშვილის მდგომარეობა დამძიმებულია. ელოდება ალტერნატიულ კონსილიუმს - ადვოკატი

მესამე პრეზიდენტის ადვოკატმა, გიორგი გელხაურმა განაცხადა, რომ მიხეილ სააკაშვილის მდგომარეობა დასუსტებულია და დამძიმებულია.

მისი თქმით, სააკაშვილი ალტერნატიულ კონსილიუმს ელოდება.

"სააკაშვილი ელოდება ალტერნატიულ კონსილიუმს, რომელიც შევა, აიღებენ ანალიზებს და მიუთითებენ ანალიზის პასუხში სასიცოცხლო მაჩვენებელი ზღვარს ქვემოთ ხომ არ არის", – აღნიშნა ადვოკატმა.

მისი თქმით, ექსპრეზიდენტი მორალურად მხნედ არის, თუმცა სასიცოცხლო მაჩვენებლები დასუსტებული აქვს.

„სასიცოცხლო მაჩვენებელი დღემდე ექიმებს ეკავათ მედიკამენტოზური ჩარევით. მიხელ სააკაშვილი აცხადებს, რომ ისევ აგრძელებს შიმშილობას, არ აპირებს საკვების მიღებას, ელოდება ექიმებთან შეხვედრას. სისუსტე ძლიერდება, მორალურად ძალიან მხნედ არის. სისუსტე გამოიხატება, რომ უჭირს ფიზიკური გადაადგილება, აქვს კიდურების შეშუპება. ამ ყველაფერში გამოიხატება მისი ჯანმრთელობის მდგომარეობა“, – განაცხადა ადვოკატმა.