ინტერპოლის პრეზიდენტად აირჩიეს არაბეთის გაერთიანებული საამიროების გენერალ-მაიორი აჰმედ ნასერ არ-რაისი, რომელიც წამების საქმეზეა ბრალდებული

ინტერპოლის პრეზიდენტად არაბეთის გაერთიანებული საამიროების გენერალ-მაიორი აჰმედ ნასერ არ-რაისი აირჩიეს. გადაწყვეტილება მიიღეს სტამბოლში გამართულ ორგანიზაციის გენერალური ასამბლეის 89-ე სესიაზე, რომელსაც 160 ქვეყნის წარმომადგენლები ესწრებოდნენ.

ინტერპოლის Twitter-ზე გამოქვეყნებულ ინფორმაციაში ნათქვამია, რომ აჰმად ნასერ არ-რაისი აღნიშნულ პოსტზე ოთხი წლის ვადით აირჩიეს. მისი წინამორბედი სამხრეთ კორეელი კიმ ჩჟონ იანი იყო, რომელიც ამ პოსტზე 2018 წლიდან მუშაობდა.

მისი დანიშვნა მწვავედ გააკრიტიკეს ევროპის ადამიანის უფლებათა დაცვის ორგანიზაციებმა. Euronews-ის ინფორმაციით,  ნასერ ალ-რაისი წამების საქმეზეა ბრალდებული. გენერლის წინააღმდეგ წამების შესახებ საჩივრები ბოლო თვეებში შეიტანეს საფრანგეთსა და თურქეთში, რომელიც ამ კვირაში სტამბოლში ინტერპოლის გენერალურ ასამბლეას მასპინძლობს.

მედიის ინფორმაციით, ახალი პრეზიდენტის არჩევამდე, არაბთა გაერთიანებულმა საამიროებმა ორგანიზაცია უხვად დააფინანსა და აბუ დაბიმ ბოროტად გამოიყენა ინტერპოლის ეგრეთ წოდებული „წითელი შეტყობინებების“ სისტემა ძებნილი ეჭვმიტანილების მიმართ პოლიტიკური დისიდენტების დევნის მიზნით.